Link açıqlığı

Bu sene mart ayında Rusiye Federatsiyasınıñ arbiyleri tarafından zapt etilgen Ukraina Silâlı Quvetleri Arbiy-deñiz küçleriniñ yardım ve mahsus gemilerniñ nevbetteki gruppası Aqyardan çıqarıldı.

Bunı Ukraina mudafaa Nazirliginiñ matbuat hızmeti bildire.

Ukraina ve Rusiye mudafaa nazirlikleri arasında tizilgen añalaşmağa köre, salı kününiñ birinci yarısında «İzâslav» imaye buksir gemisi, «Severodonetsk» fizikiy saalarnı nezaret gemisi ve «Kamenka» deñiz dalıcı gemisi tarafsız suvlarğa çıqarıldı. Künniñ ekinci yarısında gemiler gruppası qıtaiy Ukraina qısmınıñ limanlarına taba yol aldı.

Ukraina mudafaa Nazirliginiñ malümatına köre, bugünde-bugün işğal etilgen Qırımdan Ukrainanıñ qıtaiy qısım limanlarına 35 arbiy gemi, kater ve Ukraina Arbiy-deñiz quvetleriniñ gemisi çıqarıldı.
XS
SM
MD
LG