Link açıqlığı

Luganskta Milliy gvardiya boyeviklerniñ arbiy bölükke yapılğan ücümine qarşılıq kösterdi


Gece Luganskta Milliy gvardiya boyeviklerniñ ücümine qarşılıq kösterdi. Ücüm etkenler arasında öldürilgen ve yaralanğan insanlar bar, dep aytıla Milliy gvardiya saytında, haber ete Azatlıq Radiosı.

«İyün 4-de saat 00:35 uruş devam ete, arbiy hızmetçiler terroristlerge qarşılıq köstermege devam eteler ve arbiy bölükni zapt etmege imkân bermeyler. Cinayetçilerniñ faal ateş darbelerinden sebep arbiy bölükniñ avtomobil parkı yanğınğa oğradı, yanğın yüz berdi», – dep bildireler Milliy gvardiyada.

İlk malümatlarğa köre, ücüm etkenler arasında – onğa yaqın insan yaralandı, bir qaç kişi – elâk oldı. Arbiy hızmetçiler arasında da yaralanğanlar bar.

Arbiy bölükke tibbiy yardım taqımları yollanıldı.

Milliy gvardiya bergen malümatqa köre, iyün 3-de aqşam 300-den ziyade belgisiz silâlı adam Luganskta yerleşken Ukraina Milliy gvardiyası patrul-nevbet hızmetiniñ militsiya polkını sarıp aldı.

«Keçirilgen muzakereler ve uquq qoruyıcılar terroristlerniñ silânı teslim etmek talaplarına riayet etmegen soñ, cinayetçiler bölük yanında yerleşken evlerden arbiy hızmetçilerge qarşı ateş açtılar», – denile beyanatta.

Avtomat, minomöt, pülemöt ve granatomötlardan ateş açıla. Evlerniñ damlarında yerleşken snayperler de çalışıp başladı, dep bildire Milliy gvardiyanıñ matbuat hızmeti.
XS
SM
MD
LG