Link açıqlığı

Bazar ertesi aqşam Aqmescitte «Mühbirler taqiqatı merkezi»niñ eki hadimi yaqalandı. Muarrir Sergey Mokruşin ve rejissör Vladlen Melnikovnı, özlerini «imaye» askerleri kibi tanıtqan, arbiy kiymlerde silâlı adamlar yaqaladılar.

Mokruşinniñ sözlerine binaen, onı Melnikovnen beraber soqaqta «imaye askerleri» yaqalap, «ştablarına» alıp kettiler. Sorav ve köteklevni Qırım nazirler Şurası yanında cemiyet şurasınıñ sabıq azası Aleksandr Yüryev ve Aqmescit şeer şurasınıñ deputatı Anatoliy Petrov köz ettiler.

Olar, mühbirlerni qıynağanlarnı körip, kirişmediler, qayd etti Mokruşin.

Mühbirniñ aytqanına köre, onı qara ciger ve büyrekler olğan yerge, Vladlen Melnikovnı ise, başınen camğa urdılar. Telefonlarnı çekip aldılar.

Bir qaç saatke uzanğan soravdan soñ, «ştab»ğa politsiya ve acele yardımnı çağırttılar.

«Politsiya hadimleri kelgen soñ, köteklevni toqtattılar. Olar bizlernen beraber «imaye» «ştabında» eki saat oturdılar, ve ricalarımdan soñra, «imaye» vekilleri acele yardımnı çağırttılar», – dedi Mokruşin.

Başından, mühbirlerni «politsiyanıñ» Merkeziy rayon bölügine alıp ketirdiler. Andaki hadimler mühbirlerniñ aytqanlarını yazıp aldılar, amma, sorav boyunca protokol tizmediler. Qabaatlavlar da seslendirilmedi. Soñra, qaburğaları sınıq ve iç müçeleri zararlanğanına oşağan Mokruşinni Aqmescitniñ 6-nci hastahanesine alıp kettiler. Bunı mühbir Merkezniñ muarriyetine telefon vastasınen bildirdi.

Mokruşinniñ bildirgenine köre, «imaye» vekilleri oña zarar ketirgeni ve qanunsız yaqalağanı sebebinden ariza yazdı. Bundan da ğayrı, hastahanede oña, köksü ezilgeni ve qaburğaları çatlağanını bildirdiler.

«Men bu yaqalavnıñ manasını añlamayım? Ve ne içün «imaye» «ştabında» soravnı Yüryev ve Petrov keçirdiler? Ne içün qanunsız imayeciler, politsiyasız, adamlarnı yaqalap, soravnı keçireler?» – qayd etti Mokruşin.

«İmaye» vekilleri aytqanlarına köre, mühbirlerni «yaramazlıq areketleri sebebinden» yaqaladılar. Em de, «Rusiyeniñ eñ yuqarı vaziyefelerde bulunğanlarnı aqaretlegenlerinde» qabaatladılar.

Gece köteklengen mühbirlerni azat ettiler.

Salı künü «Qırım Cumhuriyeti boyunca içki işler nazirligi» mühbir Sergey Mokruşinniñ arizası boyunca teşkerüvni başladı.

Bunı Qırım.Aqiqat saytına «Qırım Cumhuriyeti boyunca içki işler nazirligi» matbuat hızmetiniñ yolbaşçısı Оlga Bogoslavskaya haber etti.

«Ariza qabul etildi ve kerekli kibi qayd etildi. Teşkerüv neticesine köre, üküm etken qanunlar boyunca qarar alınacaq. Er tarafnıñ areketlerine uquq cietinden qıymet kesilecek», – dedi Bogoslavskaya.

XS
SM
MD
LG