Link açıqlığı

«Naftogaz Ukrainı» şirketi Rusiyeniñ «Gazprom» şirketine Rusiye gazınıñ italinen bağlı davalı meselelerni çezmege yardım etecek qoşma añlaşma leyhasını yolladı, dep bildire Ukraina şirketi, haber ete Azatlıq Radiosı.

Mayıs 30-da fevral-mart aylarında ital etilgen gaz içün «Naftogaz» «Gazpromğa» 786,3 million dollarnı töledi.

İyün 2-de Rusiye gazınıñ Ukrainağa ital etilmesi boyunca Ukraina-Rusiye-Avropa Birligi erkânında üç taraflı muzakerelerniñ dörtünci basamağı ötkerilmeli. Bu muşaverede añlaşılmamazlıq olsa, Ukraina baş naziri Arseniy Yatsenük bildirgenine köre, Kiyev Stokgolm arbitraj mahkemesinde dava açtıracaq. Buña kerek olğan vesiqalar azır, Ukraina esaplarnı ödedi, dep qayd etti Yatsenük.

Rusiye bildirgenine köre, Ukrainanıñ borcu 4 milliard dollarnı teşkil ete, iyün 1-ne qadar onıñ iç olmağanda yarısını ödemege talap etile edi, ve gaz fiyatı aqqında muzakereler devam etmesi içün daa 750 million bu künleri tölenilmeli.

Ukraina bildire ki, Rusiye bir taraf olaraq gaz fiyatını bazarlıq fiyatlarına uymağan derecege qadar arttırdı ve bu fiyatnı eksiltmege tırışa.

Şimdi Rusiye Ukraina içün eñ yüksek fiyatlardan biri – biñ kubometr içün aman-aman 500 dollarnı belgiledi. Bundan da ziyadesini Frenkistan töley, o, biñ kubometr gaz içün 550 dollarnı ödey.
XS
SM
MD
LG