Link açıqlığı

Barack Obama Avropanı ziyaret etip, qırımtatar halqınıñ vekillerinen körüşmesi mümkün. Bunı prezident mesleatçısınıñ muavini Ben Rhodes brifingde bildirdi.

Rhodesnıñ aytqanına köre, körüşüv Amerika halqınıñ qırımtatar halqına birdemligini köstermek ve «Rusiyeniñ Qırım işğalini» qabul etmegenini qayd etmek içün keçirilecek. Bunı New York Times mühbiri Pieter Becker Twitterde bildire. Obamanıñ qırımtatarlar vekillerinen körüşecegini «Azatlıq» Radiosınıñ Avropa bürosı da haber ete.

Mezkür körüşüvde qırımtatarlarnı kimler temsil etecek Rhodes aytmadı. Onıñ bildirgenine köre, qırımtatarlarnıñ temsilcileri Varşavağa Poloniya parlament saylavlarınıñ 25 yıllığına bağışlanğan tedbirlerge davet etildi. O vaqıt «Birdemlik» muhalifet firqası ğalebe qazanğan edi.

Ben Rhodesnıñ Reuters bildirgen aytqanlarına köre, Obamanıñ Avropa ziyareti çerçivesinde Rusiye prezidenti Vladimir Putin ile körüşüvi planlaştırılmay. Lâkin eki lider arasında subet olması mümkün. Hatırlatamız, Obama ve Putin iyün 6-da Normandiyada ingiltere-amerika ittifaqdaşlar kelmesiniñ 70 yıllığınen bağlı tedbirge qoşulacaqlar, dep haber ete RBK.

Frenkistandaki tantanalı merasimlerde iştirak etmezden evel Obama Ukrainanıñ yañı saylanğan prezidenti Petro Poroşenko ile körüşecek. Tedbir iyün 4-de Varşavada ötkerilecek.

Reuters agentliginiñ bergen malümatlarına köre, Poroşenko eñ yaqın vaqıtta Putin ile körüşmesi mümkün – Ukrainanıñ yañı prezidentini Frenkistandaki tedbirlerge davet ettiler.

Normandiyadaki körüşüv Putinniñ Rusiyeniñ Qırım işğalinden soñ ğarbiy liderler ile ilk körüşüvi olacaqtır. Ukrainadaki adise-vaqilardan sebep Rusiyeni «büyük sekizden» quvdılar, iyün ayına Soçide keçirilmesi belgilengen «lerilegen devletler klubınıñ»sammiti ise lâğu etildi.
XS
SM
MD
LG