Link açıqlığı

Leonid Korj ve Timur Şaymardanovdan soñ cuma künü, mayıs 30-da, aqşam Aqmescitte daa bir faal adam 33 yaşlı Seyran Zinedinov ğayıp oldı. Bunı Qırım.Aqiqat saytına onıñ apayı bildirdi.

Onıñ aytqanına köre, soñki künleri onıñ aqayı ğayıp olğan Timur Şaymardanovnı qıdırdı.

«Olar Timurnen baarde, Qırımda bu vaqialar başlanğanda, tanış oldılar. O, faal bir adam, oğlanlarnen beraber ukrain arbiy bölükleri yanında nevbetçilik yapıp, yemek ve sigarlarnı ketire ediler», – dep ayta apayı Lenara.

Ğayıp olğan adamnıñ apayı dey ki, Seyran aqşam Timurnıñ soy-soplarınen körüşip, qıdıruvlar ketişatını tarif etecek edi. Olarnen körüşken soñ, bir qaç daqqadan, Seyran ile bağ üzüldi, erkek nasıl etip ve qayda ğayıp oldı belli degil.

«Böyle bir şey iç bir vaqıt olmadı. Tünevinki aqşamdan berli onıñ telefonı çalışmay. O, qayda ve kimge barğanını men bile edim. Körüşüv bir qaç daqqa sürücek edi – evimizge yaqın bir yer, Mamaq (Stroganovka) qasabası ve Lugovaya soqağınıñ çarpazında».

Timur Şaymardanovnıñ aytqanına köre, aqşam saat 20:00 olar Seyrannen körüştiler, qıdıruv işleriniñ ketişatı aqqında laf ettiler ve birazdan kettiler.

«Biz onıñnen körüştik, laf ettik. Körüşüv bir qaç daqqa devam etti, ve biz evge qayttıq. 20 daqqadan Seyrannıñ apayı telefon etti ve aqayı alâ daa körüşüvden qaytmağanını bildirdi. Bundan soñ ve şimdige qadar onıñnen bağ yoq», – dep bildirdi Timurnıñ yaqın soylarından biri.

Hatırlatamız, afta başında birden eki ukrain faali – Leonid Korj ve Timur Şaymardanov – ğayıp oldılar. Ekisi de evden çıqıp, alâ daa qaytmadılar. Olar Qırım işğaline qarşı çıqtılar ve Ukrainağa qol tuttılar. Soy-sop ve dostlarnıñ fikirince, olar aynı bu sebepten ğayıp oldılar.
XS
SM
MD
LG