Link açıqlığı

Turkiyede narazılıqlar yıllığı munasebetinen havfsızlıq tedbirlerini quvetleştirildi


Turkiyede bir yıl evelsi ükümetke qarşı yüz bergen narazılıqlar yıllığınen bağlı havfsızlıq tedbirleri quvetleştirildi.

İstanbul merkezindeki Taksim meydanında bir qaç biñ polis hadimi buluna. Yerli kütleviy haber vastalarınıñ malümatına köre, şeerde 25 biñ polis hadimi buluna, suv taşıcı maşinalar ve zırhlı maşinalar celp etildi.

Turkiye baş naziri Recep Tayip Erdoğan gençlerni keçken seneniñ adise-vaqialar yıllığını qayd etmek çağıruvlarına qulaq asmamağa çağırdı.

Keçken sene İstanbulnıñ Gezi bağçasında tereklerniñ kesip atmasına qarşı narazılıq aktsiyaları kütleviy numayışlarğa çevirildi. Havfsızlıq quvetleri olarnı sert bir şekilde dağıttılar. Çatışmalarda bir qaç insan elâk oldı, biñlernen adam yaralandı.

Gezi bağçasını qoruv narazılıqlarınıñ teşkilâtçıları bugün İstanbulda numayış ötkerilmesine çağırdılar. Berilgen malümatqa köre, numayışlar Turkiyeniñ diger şeerleri, şu cümleden Ankara, İzmir ve Antalyada keçirilecek.
XS
SM
MD
LG