Link açıqlığı

Qırım «devlet şurasınıñ» milletlerara munasebetler ve sürgün olunğan grajdanlarnıñ işleri boyunca Daimiy komissiyasınıñ yolbaşçısı Edip Gafarov Qırımtatar Milliy Meclisi tarafından namzeti teklif etilgen Lenur İslâmovnı Qırımnıñ «baş nazir muavini» vazifesinden boşatuv sebeplerini aydınlattı.

«İslâmov baş nazir vazifesine tayin etilgen soñ, qayda ve ne sebepten bulunğanını yahşı añlamadı, ğaliba. Mesele onıñ iş çizgilerinde degil, Rusiye memurı iş adamı olmamaq kerek. Em de onıñ eki skemle üstünle oturmaq niyeti: Cemilevniñ Rusiyege qarşı aktsiyalarında iştirak etmek ve Rusiye devlet hızmetinde bulunmaq – muvafaqiyetnen yekünlenmez. Eñ evelâ içtimaiy-iqtisadiy meselelernen oğraşmaq kerek edi: suv teminlevi, Vatanına qaytıp kelgenlerniñ toplu yaşağan yerlerini abadanlaştıruv, olarğa ev berüv, lâkin aynı bu işlerni yapmaq niyetleri körünmedi», – dep bildirdi GTRK «Krım» yayınında Gafarov, haber ete «Devlet şurasınıñ» matbuat hızmeti.

Gafarovnıñ aytqanına köre, Qırım «parlamenti», federal organları Ukrainada olğanı kibi, qırımtatar mevzusı bir de bir taqımğa şahsiy maqsatlarnen qullanmaq içün berilmeycegini yahşı etip kösterdiler.

Qırım.Aqiqat bergen malümatlarğa köre, çarşenbe künü, mayıs 28-de, Qırım «Devlet şurası» ATR telekanalınıñ saibi Lenur İslâmovnı «baş nazir muavini» vazifesinden boşattı. Onıñ yerine Mecliske qarşı çıqqan siyasetçi Ruslan Balbek tayin etildi.

Malüm olğanı kibi, mayıs 16-da Soçi şeerinde qırımtatar halqı sürgünliginiñ 70 yıllığı arfesinde Rusiye prezidenti Vladimir Putin bir sıra qırımtatar vekillerinen körüşti. Olarnıñ arasında Gafarov ve Balbek de bar ediler.
XS
SM
MD
LG