Link açıqlığı

Saatnıñ esas haberi

Ukraina vekili: Cemilevniñ Qırımğa kiriş yasağı BMT beyannamesini boza


Ukraina Yuqarı Radasınıñ insan aq-uquqları boyunca vekâletli vekil Valeriya Lutkovskaya Qırımtatar Milliy Meclisiniñ sabıq reisi Mustafa Cemilevniñ Qırımğa kiriş yasağınen oğraşıp başladı.

Bu aqqında malümat Ukraina vekiliniñ saytında peyda oldı.

Lutkovskaya Rusiyeniñ bir sıra üyken memurları, şu cümleden Federal havfsızlıq hızmetiniñ müdiri Aleksandr Bortnikov, Federal migratsion hızmetiniñ reberi Konstantin Romodanovskiy ve içki işler Naziri Vladimir Kolokoltsevge muracaatta bulunıp, Mustafa Cemilevniñ Qırımğa kiriş yasağını aydınlattı.

«Valeriya Lutkovskaya qayd etti ki, Mustafa Cemilev onıñ Qırımğa kiriş yasağını tasdıqlağan resmiy bir vesiqa almadı, şu sebepten Rusiye Federatsiyası organlarınıñ qararına şikâyet etmek imkânsızdır», – denile beyanatta.

«Rusiye Federatsiyası organlarınıñ Qırımda yapqan areketleri halqara uquq, hususan, Birleşken Milletler Teşkilâtınıñ tamır halqlar aqqında Beyannamesinen pekitilgen insan ve tamır halqnıñ aq-uquqları ve serbestligini boza», – dep qayd etti öz muracaatlarında Lutkovskaya.

Malüm olğanı kibi, mayıs 2-de Mustafa Cemilev Moskvadan Aqmescitke uçaqnen kelecek edi. Kiyevden Moskvağa kelgen qırımtatarlarnıñ liderini pasport nezaretinden keçirmeyip, oña kiriş yasaq etilgenini bildirdiler. Deputat Kiyevge keri qaytmağa mecbur oldı.

Aprel 22-de Cemilev Qırımğa kelir eken, kiriş noqtasından oña 5 yıl devamında Qırımğa kelmek yasaq aqqında senet tuttırdılar. Bu vaqianı Rusiyeniñ insan aqları vekili ögrenip başladı.
XS
SM
MD
LG