Link açıqlığı

Qırım abituriyentleri VNOnı Harkov vilâyetinde berecekler


Qırım, em de Lugansk ve Donetsk vilâyetleriniñ mektep mezunları tışqı mustaqil imtianlarını Harkov vilâyetinde berecekler.

Bunı Harkov vilâyet devlet memuriyetiniñ reis muavini Yuriy Georgiyevskiy bildirdi, dep haber ete Ukrinform.

«Harkov vilâyetinde yarımadanı terk etken Qırım mezunları, em de Lugansk ve Donetsk mektep mezunlarına tışqı mustaqil imtianlarını bermek imkân bergen şaraitler bar», – dedi o.

Georgiyevskiy bildirdi ki, patlav maddeleri olmasın dep, imtian noqtaları teşkerilecek. Bundan ğayrı, «GAİ yol ve maşina duraqlarındaki vaziyetni közetecek. Ekimler nevbetçilik yapacaq. Vokzaldan imtian noqtalarına qadar yürgen naqliye vastalarınıñ sayısı arttırıldı, saqatlarnıñ menfaatları da köz ögüne alındı».

Qayd etmeli ki, Qırım Muhtar Cumhuriyeti ve Aqyardan kelgen tahminen 40 adam Harkov vilâyetinde VNO imtianlarını bermek içün qayd etildi.

Umumen Harkov vilâyetinde VNO iştirakçilerniñ 17 biñi qayd etildi – bu seneniñ ve keçken yıllarınıñ mektep mezunları. Vilâyette testler berilmesi içün 5 bölge meydanğa ketirildi. VNO keçirilmesine aman-aman 3000 oca celp etildi.

Hatırlatamız, VNO imtianlarınıñ esas sessiyası iyün 3-ten 27-ne qadar keçirilecek, qoşma – iyül 1-den 15-ne qadar.
XS
SM
MD
LG