Link açıqlığı

Naciye Femi

Aqmescit – Rusiye Federatsiyası Mustafa Cemilevge qarşı. Ukraina halq deputatı, Meclisniñ sabıq reisine yarımadağa kiriş ale daa yasaqtır. Qırımda qalğan Cemilevniñ qorantası Rusiye mahsus hızmetlerniñ nezareti altında buluna. Mustafa Cemilevniñ qorantasına basqı yapıp ta, mevamını deñiştirmek maqsadında çeşit türlü usullar qullanıla. Soñki «yañılıq» – öldürüvde qabaatlanıp, taqiqat altında bulunğan Cemilevniñ oğlu – Hayserge qarşı yapılğan informatsion ücümi oldı.


Ukraina halq deputatı Mustafa Cemilevniñ oğlu – Hayser, Rusiye Federatsiyasınıñ pasportını elde etkeni aqqında davalı malümatnı Facebook-ta qullanıcı Yuriy Fetiyev «Qırım Cumhuriyeti» boyunca Rusiye Federal Migratsion Hızmetiniñ bildirmesine esaslanıp yazdı. Qullanıcı, onı müessisede çalışıp, «lâqayd qalmağan» hadimlerden alğanını haber etti. Delil olaraq, aprel 26 künü qoluna tüşken Cemilev Hayser Mustafa öglu adına vesiqalar fotoresimini de yerleştirdi.

Adliyeci küçük-Cemilevniñ Rusiye vatandaşlığı aqqında malümatnı red etti.

Hayserniñ özü şimdiki vaqıtta taqiqat izolâtorında buluna, şimdiki vaqıtta onıñ işi baqıla. Belgisiz, amma ğayet haberdar olğan internet qullanıcınıñ tahminlerine köre, Rsiye pasportı oña mesülietlikten qaçmağa yardım eter.

«Camilov (Cemilev – müel.) Rusiye vatandaşlığını yapqan cinayetligi içün mesülietsiz qalmaq maqsadınen adliyecisi Aleksandr Lesovoynıñ tevsiyesi ile aldı, çünki aprel 14 künü 2014 senesi Rusiye Baş prokuraturası qırımlı mabüslerge qarar almağa imkân berdi – rusiyeli vatandaşlıqnı alıp ta Qırımda qalmaq ya da Ukrainağa ketip, anda cezasını körmek. Aynı zamanda, Rusiye pasportlarını alğanlar, devlet anayasasınıñ 20 yıllığı munasebetinen 2013 senesi dekabr ayında ilân etilgen amnistiyağa oğray bileler», – dep yazdı Yuriy Fetiyev.

Küçük-Cemilevniñ adliyecisi Qırım.Aqiqatqa bildirgenine köre, Hayser resmiy olraq Rusiye vatandaşlığını red etti.

«Cemilev Hayser Rusiye Federatsiyasınıñ qanunlarına köre, vesiqalarnı Aqmescit ve Moskva migratsion hızmetine vaqtında berdi, vesiqalarda Ukraina vatandaşlığında qalması ve Rusiye Federatsiyası vatandaşlığından vazgeçkeni aqqında beyan etile. Bunen beraber, Kiyev şeerinde qayd etilgen ve yaşağanı bildirildi», – dep qayd etti adliyeci.
Lesovoy, Hayser Cemilev Rusiye grajdanlığını qabul etmege istemegenini vesiqalar nushalarınen tasdiqladı ve Qırım.Aqiqatqa taqdim etti.

Aynı zamanda, adliyeciniñ fikirince, Hayser Cemilevniñ red etkenine baqmadan, Rusiye pasportı kerçekten de mevcut olğanını tahmin ete.

Lesovoy, bu kibi müim vesiqalar aqqında o ve Hayser Cemilev içtimaiy ağlardan haber alğanından şaşıp qaldı.

«Eñ taacip etici fakt – cinaiy işniñ taqiqatında iştirak etmegen, amma, şahsiy malümat ve vesiqalarğa irişe bilgen adiy şahıs bu vesiqalarnı internette yerleştirdi», – dep qayd etti adliyeci.

Mustafa Cemilevge tesir etmek içün yapılğan daa bir adım – mütehassıs

Yaqın şarqiy taqiqatlar Merkeziniñ müdiri İgor Semivolosnıñ bildirgenine köre, bu informatsiyaon ücümi Mustafa Cemilevge basqı tesir etmek içün daa bir ıntıluvdır.

«Şimdiki vaqıtta Rusiye akimiyeti Mustafa beyge «basqı etmek» ya da qaralmaq içün er türlü imkânlarnı qullanacaq. Onı küçsüz ve ümütsizlikke qapılğanını isteyler. Oğlunı qayğırğanı açıqtan-açıq körüne, onıñ içün de bu oña qarşı yapılğan doğrudan-doğru basqıdır», – dedi ekspert.

Onıñ fikirince, Cemilevniñ qorantasını sıqırcaqları mümkün. «Mustafa-bey cesür insan, bir çoq qıyınlıqlar kördi ve bu kibi «ayın-oyunlar» qatiyligini deñiştirmez ve yıqmaz», – dedi İgor Semivolos.
XS
SM
MD
LG