Link açıqlığı

Meclis eyyeti Tatarstan Prezidenti ile körüşti


Bazar ertesi künü, mayıs 26-da, Qazanda Tatarstan Prezidenti Rustam Minnihanov Qırımtatar Milliy Meclisiniñ eyyetinen körüşti. Subet devamında qırımtatarlarnıñ temsiliy organı ve Tatarstan Cumhuriyetiniñ reberligi arasında işbirlik meselesi muzakere etildi.

Qazan Kremlinde olıp keçken körüşüvde Meclis reisi Refat Çubarov, Qırım Cumhuriyetiniñ «baş nazir muavini vazifesini eda etken» Lenur İslâmov, Meclis reisiniñ muavini Ahtem Çiygoz, Bağçasaray rayon memuriyetiniñ reisi İlmi Umerov, Bağçasaray tarihiy-medeniy qoruğınıñ baş müdir muavini Ali Abdullayev iştirak ettiler. Tatarstan tarafını Cumhuriyet Nazirler Şurasınıñ Apparat reberi Asgat Safarov, baş nazir muavini – Tatarstan Cumhuriyetiniñ Nazirler Şurası Apparatınıñ reberi Şamil Gafarov, TC Prezident Apparatınıñ reber muavini Aleksandr Terenyev, TC Prezidentiniñ halqara meseleleri yardımcısı Radik Gimatdinov, Bütündünya tatarlar kongressiniñ icra komitet reisi Rinat Zakirov temsil ettiler.

Qazanda Meclis eyyeti ilk evelâ Bütündünya tatarlar kongressi ile 2014-2018 senelerine işbirlik memorandumını imzladınlar. Ondan soñ Qırımdan kelgen musafirler içün Qazandaki Kremlde ekskursiya keçirildi.

Körüşüvniñ açılışında Tatarstan Prezidenti böyle qatnaşmalar müim olğanını qayd etti.

«Şimdi qırımtatarlarnıñ yaşayışında pek müim deñişmeler olıp keçe. Böyle vaziyette qırımtatarlarnıñ kelecegi parlaq olsun dep, areketetmek kerek. Bu meselede Tatarstannıñ Rusiyede bulunmasınıñ tecribesi sizge pek faydalı olur», – dedi Minnihanov.

Onıñ fikirince, Qırımnıñ inkişaf etilmesinde mıtlaq qırımtatar halqınıñ menfaatını köz ögüne almaq kerek. Bunı yapmaq içün, Minnihanov Tatarstannen beraber qırımtatarlarğa federal merkezinen konstruktiv dialog qurmağa teklif ete.

Tatarstan yolbaşçınıñ matbuat hızmeti bildirgenine köre, şu künü de Bağçasaray devlet idaresiniñ reisi İlmi Umerov Tatarstan baş naziri İldar Halikov ile körüşti. Körüşüvde ilerideki işbirlik meselesi muzakere etildi.

Halikov qayd etkenine köre, Qırım şimdi bu qıyın keçici zamanlarda yaşay, qanunlar deñişe. Biz Qırım ve Tatarstan arasında işbirlik formatını taptıq, -- dedi baş nazir. Ondan da ğayrı, o, bugünde-bugün Rusiyede olğan ve ömürge keçirilgen federal programmalar Qırımnı da qavrap alacaq.

İşbirlikniñ ilerideki planlar arasında – tasil saasında, şu cümleden Qırım abituriyentleriniñ Tatarstan aliy oquv yurtlarında tasil aluv imkânları, Tatarstan iş adamlarınıñ Qırım Cumhuriyetinde biznes-missiyasınen bağlı meselelerniñ muzakeresi.
XS
SM
MD
LG