Link açıqlığı

Ukraina baş naziri Arseniy Yatsenük bildirdi ki, mayıs 29-na qadar «Naftogaz Ukrainı» ve Rusiyeniñ «Gazprom» şirketi arasında añlaşmalar imzalanmasa, şirketler Stokgolm arbitraj mahkemesinde körüşecekler, dep haber ete Azatlıq Radiosı.

Onıñ aytqanına köre, Rusiye tarafı özüni lâyıq bir şekilde alıp barmasa da, gaz şirketleri arasında añlaşmanı imzalamaq imkânı da bar.

«Ümüt etemiz ki, bizim Rusiye qomşularımızda doğru bir fikir peyda olur da, «Naftogaz» ve «Gazprom» arasında añlaşma imzalanacaq», - dep ayttı ükümet toplaşuvınıñ başında baş nazir.

Bunıñnen beraber, o, bugünde-bugün Rusiye ile eki taraflı muzakereler keçirmek imkânsız olğanını ayttı.

«Olarnen masa başına otursañ – ille aldatırlar, soñra ise emin ve aqıllı yüzüni kösterip, böyle olğanını aytacaqlar», -- dep qoştı baş nazir.

«Naftogaz» Avropa Birliginiñ iştiragi ile keçirilgen Rusiyenen gaz muzakereler neticesiz oldı.

Rusiyeniñ «Gazprom» şirketi «Naftogaz Ukrainı» şirketine iyün ayı içün 1,66 milliard dollar miqdarında ilk esapnı taqdim etti. Rusiye şirketiniñ malümatına köre, Ukrainanıñ borcu tahminen 3,5 mlrd. dollarnı teşkil ete.

Arseniy Yatsenük dedi ki, «Gazprom» ile biñ kubometr gaz içün 268,5 dollar miqdarında gaz fiyatı belgilense, Ukraina Rusiye gazı içün esaplarnı on kün içinde ödeycek.

Şimdi Rusiye Ukraina içün gaz fiyatını 500 dollar olaraq belgiledi. Frenkistan gaz içün 550 dollar töley.

«Naftogaz» malümatına köre, Ukraina, Rusiye ve Avropa iştiraki ile üç taraflı gaz muzakereleri bu aftanıñ soñuna qadar keçirilecek.
XS
SM
MD
LG