Link açıqlığı

Rusiye müftiyler şurası (RMŞ) akimiyetke Qırımda islâm diniy institutnı açmağa ricada bulundı. Planlaştırıla ki, aliy oquv yurtunda ruhaniylerni azırlacaqlar ve yarımadada ruhiy-diniy tasilini inkişaf etecekler.

Bu aqta malümat Rusiye müftiyler şurasınıñ saytında yerleşe.

Bu rica ile prezident memuriyetine Rusiyeniñ Avropalı qısmınıñ musulmanlar idaresiniñ muavini Damir Hazrat Muhametdinov bulundı.

Aynı rica ile musulman ruhaniyleri Rusiye akimiyetiniñ reis muavini Dmitriy Kozakqa bulundı,o 2014 senesi mart 23-den Qırım ve Aqyar ile bağlı suallerni nezaret ete.

Aliy oquv yurtunı peyda etmek ğayesi, Damir Hazrat Muhametdinovnıñ sözlerine köre, regionnıñ Müftiyler Şurasınıñ ve Rusiyeniñ Avropalı qısmınıñ musulmanlar diniy idaresiniñ reisiniñ Ravil Gaynutdinniñ Qırım musulmanları ile ziyareti vaqtında peyda oldı.

«Qırımtatarlar, öz faalligine baqmadan, al-azırda merkezniñ desteginde muhtacdır, – dep bildire Muhametdinov. — Biz Qırımda diniy aliy oquv yurtınıñ olmağanını muzakere ettik. Subet neticesinde biz prezident memuriyetine ve akimiyetke Qırmda aliy oquv yurtınıñ meydanğa ketirimesine qol tutmaq ricamız ile bulundıq».

Bunıñ ile bir sırada, saytta Qırım islâmşınaslıq ilmiy merkeziniñ professorı Ayder Bulatovnıñ aytqanı yazıla. O, bugün qırımatatar yaşları diniy tasilni çetelde alğanını ayttı, faqat işbu tasil qırımtatarlar içün adetiy degildir.

«Sovet zamanı vaqtında mında islâm dinine ögretken iç bir oquv yurtı yoq edi. Şunıñ içün dinni ögrenmege istegenler Türkiye ve arap memleketlerine ketmege başladı, andan qırımtatarlarğa ait olmğan tasil ile qayta edi, – dedi Bulatov. – Şunıñ içün Qırımda böyle aliy oquv yurtınıñ açılması pek aktualdir. Bu al musulman qırımtatarlarda bu meselede mustaqil olmağa imkân yaratır».

Muhametdinovnıñ sözlerine köre, işbu institutnıñ maliye destegi akimiyet tarafından razılıq alğanından soñ muzakere etilecek.
XS
SM
MD
LG