Link açıqlığı

Saatnıñ esas haberi

Qırımnıñ Ukrainağa qaytuvı müddeti – bir qaç aydan, 2-3 yılğace uzana bilir, dep tüşüne Cemilev


Qırımtatarlarnıñ yetekçisi Mustafa Cemilev Qırımnıñ Ukrainağa tezden qaytuvını tahmin ete. Bunı o Radіo Svoboda efirinde bildirdi.

Hususan, yarımadanıñ Rusiye işğalinden azat olunuv meseleni muzakere etkende, Cemilev qayd etti ki, Qırımnıñ qaytarıluvı bir qaç aydan, 2-3 yılğace uzana bilecek eken.

«İşğal bütün halqara qaidelerge ters kele. E, biz halqara qaidelerge uymağan devlet ile iş köremiz, amma aqiqat bar, ondan iç bir devlet qaça bilemez. İzolâtsiya devam etecektir. Rusiye iqtisadiy ziyannı körecektir», – dedi Cemilev.

Onıñ sözlerine köre, Rusiye prezidenti Vladimir Putin etrafında ciddiy memnüyetsizlik duyulmaqta, bu ise çezilüvge ketirecektir.

Bunıñ ile beraber o şunı da qayd etti ki, Medvedevniñ işğal etilgen Qırımğa bazar künü ziyareti quvançlıdır, çünki «bu al kene de Rusiye memurlarnıñ halqara uquqlarğa olğan edepsizligini bütün dünyağa kösterir».

«Eger de böyle ziyaretler olmasa edi, belki de, Qırım vaziyeti art planğa kete bile edi. Amma Putinniñ Ğalebe kününe ve Medvedevniñ ziyareti sebebinden bu mesele kün tertibinde turacaqtır, – dedi Cemilev. – Olar kene de dünya toplulığına qarşı çıqalar, bizim içün bu pek müim».

Qırımtatarlarnıñ yetekçisi qayd etkeni kibi, dünya mıtlaqa böyle areketlerge cevap qaytarır.


Ukraina akimiyeti, AQŞ, Avropa birligi er vaqıt Rusiyeniñ Qırım işğalini tanımağanını qayd ete.

Bazar künü, mayıs 25-de, Qırımğa iş ziyareti çerçivesinde Rusiye baş naziri Dmitriy Medvedev keldi. Ukraina çetel işler nazirligi ukrain akimiyeti ile qararlaştırılmağan Rusiye ükümeti başınıñ ziyareti munasebeti ile öz memnüniyetsizligini bildirdi.
XS
SM
MD
LG