Link açıqlığı

Siyasiy vaziyetniñ ilerilemesine baqmadan, «Simferopol» ava limanına halqara statusı qaytarılacaq, dedi Rusiye naqlie naziri Maksim Sokolov, haber ete AN-Krım.

Qırımğa seferlerniñ miqdarı aqqında aytqanda, o qayd etti ki, eger de bugün Qırımğa Rusiyeniñ çeşit şeerlerinden künde 290 sefer olsa, iyünden 25 olacaq.

Uçaqlarnıñ kölemi de deñişecek. Qırımğa «Boing 747» (467 yolcu) ve «Aerbas» (400 yolcu) baracaq. Qayd eteyik ki, şimdi uçaqlar 200-250 insannı ala.

Aqmescit ava limanınıñ köterilüv-minüv yolağı da, nazirniñ fikrince, qanaatlendiricidir ve «Boing 747» ve«Aerbas 330» uzaq magistral uçaqlarnı qabul ete bile.

Ava limanı rekonstruktsiyadan keçecek, Sokolov aytqanı kibi, bu maqsat ile federal programmağa teklif azırlana.

«O, şübesiz, halqara olaraq açılacaq, – dedi nazir. – Bunıñ qullanılması siyasiy vaziyetniñ ilerilemesine bağlı olacaqtır, amma mıtlaqa olur».

Ukraina infrastruktura Nazirligi işğal etilgen Qırım ava limanları uçaqlarnıñ havsızlığı telüke astında olğanı içün qapalı olğanını qayd etken edi.

Avropa ava boşluğında hızmet etken Avropa nezareti aviataşıyıcılarnı Aqmescit ve Aqyarğa uçuşlar yasaq olğanı aqqında haberdar etken edi. Halqara aviatsion idare qaidelerine esaslanıp, avropalı teşkilât yalıñız ukraina akimiyeti tarafından berilgen qararlarğa riayet etkenini bildire edi.
XS
SM
MD
LG