Link açıqlığı

Kiyevde birinci Bütünukraina Qırımdan mecburiy icret etkenleriniñ keñeşi başlandı.

Qırım.Aqiqat hadimi bildirgenine köre, syezdniñ iştirakçileri arasında Ukraina halq deputatları, cemaat erbapları bar. Ukraina Prezidentiniñ idaresinden Andrey İvanets keldi. O vaqtınca işğal etilgen topraqlar meseleleri boyunca bölüginde başlıq ete. Ondan da ğayrı merasimge Kiyev Patriarhatınıñ Simferopol ve Qırım Arhiyepiskopı vladıka Kliment keldi ve başqalarnen beraber açılışta söz ayttı.

Syezdde bir qaç iş gruppası çalışacaq. Olar: vaqtınca ve daimiy mesken meselesinde, qanuniy teşebbüsleri ve uquqiy temin etüvi, içtimaiy temin etüvi ve tasil meselesinde, devlet organlarınen ve halqara müessiselernen işbirligi meselesinde ve biznes ve bankçılıq meseleleri üzerinde çalışacaqlar.

İş gruppalarğa uyğan nazirlikler temsilcileri kirgen.

Tolplanğanlarnıñ esas maqsadı olaraq Qırımdan köçip kelgenleriniñ problemlerini çezmek içün plan tizmesidir.

«Biz icret etkenleriniñ yerleşmesi böyünca plan tizmek kerekmiz, lâkin esas vazifemiz Qırımnı Ukrainağa qaytarmaq içün bir plan kerek», – dedi Qırım Avromaydanıñ yolbaşçılarından birisi Sergey Kovalskiy.

Üyleden soñ syezd iştirakçileri komitetlerde işlerini başlaycaqlar.

Farqlı menbalarğa köre, Qırım işğal olunğan soñ qıtağa 10-dan 20-ge biñge qadar Qırım sakini icret etti. Syezdniñ yolbaşçılarından birisi Andrey Şekun aytqanına köre, icret etkenler içün eñ esas problem bu meksenlernen temin etüvdir.
XS
SM
MD
LG