Link açıqlığı

İşğal etilgen Aqyardan köçip ketken Nahimov oquv yurtunıñ kursantları Avropa aliy oquv yurtlarında oquşını devam etecekler


Odessada, Arbiy akademiyasında, P.S.Nahimov adına Arbiy-Deñiz quvetleriniñ akademiya kursantları esas fenlerden ğayrı, ingliz tilini ögrenip, Büyük Britaniya ve Frenkistan aliy oquv yurtunda oqumağa azırlanalar.

Bunı ükümet portalı bildire.

«Ukraina mudafaa Nazirligine Büyük Britaniya ve Frenkistan zenaatdaşlarımızdan teklifler keldi. Bu devletlerniñ arbiy hızmetleri NATO gemilerinde deñiz ameliyatını keçecek ekinci ve üçünci kurs zabitlerine oquşnı devam etmege imkân bereler», – dep ayta P.S.Nahimov adına VMS Akademiya yolbaşçısınıñ terbiye işleri boyunca muavin vazifelerini eda etken 2 rutbe kapitanı Arkadiy Stepanenko.

Ağımdaki seneniñ sentâbr 1-den başlap ve leytenant rutbesine qadar Büyük Britaniyada 10 kursant bedava oquycaq, Frenkistanda – yedi.

Stepanenkonıñ aytqanına köre, şimdi namzetlerni seçip alalar. Bu oquş yılınıñ soñunda arbiy nizam ve oquştan eñ eyi neticelerni köstergen talebeler mezkür imkân ile faydalana bilecekler.

Rusiyeniñ Qırım işğalinden soñ Rusiye prezidenti Vladimir Putin Akademiyağa Nahimov adına Qara deñiz yuqarı arbiy-deñiz oquv yurtı adını bermek qararını imzaladı.

Ukraina bayraqları yerine Rusiye bayraqları asılğanda kursantlar Ukraina gimnini yırladılar.
XS
SM
MD
LG