Link açıqlığı

«Çernomorneftegaz» müessisesi borc ödemesinden vazgeçken büyük teşkilâtlarğa gaz berilmesini ya sıñırlay, ya da bütünley toqtatacaq, dep bildirdi müessiseniñ «baş müdir muavini», Qırım «parlamentiniñ» deputatı Vasiliy Rogatin, dep haber ete Qırım «akimiyetine» yaqın olğan Krıminform saytı.

Qullanıcılarnıñ müessise ögünde borcları toqtamay arta. Talil neticelerine köre, «Krımteploelektrotsentral», «Krımteplokommunenergo», «Qırım demir yolu», «Ukrgazprom» ve «Cürçi» müessiseleriniñ borcları bar, dep ayttı Rogatin.

Onıñ qayd etkenine köre, bugünde-bugün mezkür müessiselerniñ «Çernomorneftegaz» ögünde borcları 402 mln rubleni teşkil ete.

Rogatinniñ aytqanına köre, «Çernomorneftegaz» – yarımadada yekâne tabiiy yaqarlıq temin eticisi ola, «qışta qırımlılarnıñ evi, bala bağçaları, mektep ve hastahanelerde sıcaq olması, em de sanayı müessiseleriniñ işi» şirket yılnıñ soñuna qadar 2 mlrd kubometr gaznı işlep çıqarılmasına bağlı.

O, şunı da bildirdi ki, Aqyardaki «SGS Plüs», «Sevteploenergo» ve «Komfort» müessiseleriniñ de borcları bar. Olarnıñ miqdarı mayıs 21-de 39 mln rubleni teşkil etti.
XS
SM
MD
LG