Link açıqlığı

Mustafa Çauş

Aqmescit – İşğal etilgen Qırım «akimiyeti» ve qırımtatarlar arasındaki kergin munasebetlerge yañı şahıslar qoşuldı. Qırım «parlamenti» vazifesini eda etken «Devlet şurası» soñki toplaşuvında «vitse-spikerni» belgiledi. Bu vazifege Meclisniñ körümli vekillerinden biri Remzi İlyasov keçti. Onıñ namzetini deputatlarnıñ ekseriyeti destekledi. Öz başına tayinlengen Qırım «spikeri» Vladimir Konstantinov yañı muavininiñ peyda oluvını alğışlap, «eyi bir alâmet» olğanını bildirdi, Meclis ise, aksine İlyasovnıñ areketlerini takbih etti.

Kün evelsi, Qırım «parlamentniñ» kün tertibinde. Meclis tarafından belgilenlengen namzet, baş nazir muavini Lenur İslâmovnıñ işten boşatılacağı aqqında mesele kirsetelicegi etrafında öşekler tarqağan edi.

«Muavin» vazifelerinde olğan qırımtatarlar

İslâmovnıñ vazifesinden boşatıluvı aqqında, Soçide mayıs 17 künü Rusiye prezidenti Vladimir Putinniñ şimdiki akimiyetke baqqan qırımtatar eyyeti ile körüşüvinden soñra, söz yürütilip başladı. Eyyet terkibinde devlet hızmetinde bulunğan Lenur İslâmov yoq, amma, Meclis azası Remzi İlyasov buluna edi. Onıñ namzetine 77 deputattan 74 yani aman-aman episi qol tuttı. İslâmovnıñ istifası aqqında mesele asılında baqılmadı.

Şimdiki Qırım «akimiyeti» ve qırımtatarlar arasındaki munasebetlerni közetkenler içün Remzi İlyasovnıñ Qırım parlamentinde vitse-spiker vazifesine tayinlenüvi taacipli bir haber oldı. Faqat, Meclis ve Qurultay azası özü aytqanı kibi, onıñ bu işke kirişkeni aqqında soñki üç ay devamında muzakereler kete edi.

«Biz çoq tüşündik ve bizim soñki laqırdımız mayıs 5 künü Meclisniñ toplaşuvında edi. O vaqıt, mayıs 18-nden soñ, bu vazifege menim namzetim teklif etilecegi aytıldı», – dep, izaatladı Remzi İlyasov.

Qırım «spikeri» Vladimir Konstantinov yañı muavini peyda oluvını alğışlap, tek eyi taraflarını kördi. «Bizni teñqid etmek ya da muhalifette olmaq mümkün, amma iştirak etmemege mümkün degil, çünki bütün halq çekişecek. Onıñ içün qabul etilgen qararnıñ yalıñız eyi alâmetleri bar, birlikte çalışıp başlarmız», – dedi Vladimir Konstantinov.

Meclis «razılıq» bermedi


Meclisniñ resmiy izaatı şu künü aqşam peyda oldı. Bundan evel, Meclisniñ özünde, Remzi İlyasovnı alğışlağan ya da aksine teñqid etken yekâne fikir yoq, dep aytqan ediler. Keçenlerde, o Meclis reisi vazifesine namzetlerniñ biri edi ve saylavlar neticesinde raqibi Refat Çubarovğa yuttırdı, oña 12 ses yetişmedi.

Meclis reisi Refat Çubarov şunı bildirdi: «Bizim şerigimiz biraz aşıqtı. Bugünki şaraitlerimizde milletniñ eñ müim meseleleri çezilmey qalğanda, akimiyetniñ (müel. qaydları) işinde, vitse-spiker vazifesinde bile, bir insannıñ iştiragi iç bir fayda bermez».

Aynı zamanda yañı tayinlengen «vitse-spiker» matbuat vastaları saifelerinde öz planları ile paylaştı: Rusiye Federatsiyası prezidentiniñ sürgün etilgenlerniñ abadanlaştıruvı boyunca bütün emirlerni eda etecegini qayd etti. Remzi İlyasov, hususan, til meselesi ve Qırımdan tış qalğan vatandaşlarnıñ avdeti meselelerini çezmege niyetlendi.
XS
SM
MD
LG