Link açıqlığı

Keriçliler kommunal hızmetlerini ödemek içün saatlernen nevbetini bekleyler


Keriçliler kommunal hızmetlerini ödemek içün sabadan «Krımpoçta» müessisesi yanında nevbet tutmağa mecburlar.

Qırım.Aqiqat mühbirine belli olğanı kibi, er kün saba saat sekizlerde mında yigirmige yaqın insan toplaşa. Üylege qadar nevbet uzunlaşa, lâkin üyle teneffüsine qadar kommunal hızmetlerini ödemek imkânı yalıñız bölük açılmazdan evel kelgenlerde bar.

Bir çoq adam kendi esaplarından ğayrı, qomşu, dost ve soy-soplarınıñ kommunal hızmetlerini ödey. Şu sebepten nevbet bitmey.

Bayağı adam bir qaç kün devamında nevbetini bekley. Bir qaç saat beklep, olar yarın qaytmaq içün, işini baqmağa keteler.

Bundan evel kommunal hızmetleri içün ödevlerni qabul etken ukrain banklarınıñ bölükleri işini toqtattılar. Ödevlerni alâ daa qabul etken «ÇBRR» Qırım bankında nevbet bir ay ögüne tizile.

Onıñ içün Keriç akimiyeti şeer sakinlerini «Krımpoçta» hızmetlerinden faydalanmağa çağırdı.

Bu arada, KRP «Voda Krıma» Keriç bölüginiñ idaresinde ödevlerni qabul etmek içün dört kassa açıldı.

Qırım.Aqiqat bergen malümatqa köre, bu künleri keriçlilerni sıcaq suvsız qaldırdılar.

Qayd etmeli ki, işğal etilgen Keriçte tükânlarnıñ rafları bom-boş qaldı.
XS
SM
MD
LG