Link açıqlığı

Bu sene qırımtatar halqınıñ öz Vatanında aqlarınıñ temin etilmesi, onıñ Qırımdaki havfsızlığı ve inkişafı boyunca Halqara Forumı keçecektir.

Böyle qarar qırımtatar halqınıñ yetekçisi, Ukraina halq deputatı Mustafa Cemilevniñ kenişlev sualleri ve Avropa qomşulıq siyaseti boyuca Avropa komissarı Ştefan Füle ile Kiyevdeki körüşüvi devamında alındı.

Qırım.Aqiqat mühbirine qırımtatar milliy Meclisniñ tış alâqalar bölüginiñ yolbaşçısı Ali Hamzin aytqanı kibi, forum 2014 senesiniñ soñunace Ukraina tışında, Avropanıñ memleketleriniñ birisinde olacaqtır.

Onıñ sözlerine köre, Forumnıñ yeri onda iştirak etecek ğarp siyasetçileri, memur ve donorlarına bağlıdır. Bundan da ğayrı, Forumda Ukraina memurlarınıñ da iştiragi beklenile.

Qırımtatar milliy Meclisi qırımtatarlarnıñ aqları boyunca Halqara Forumnı sürgünlikniñ 70 yıllığından evel keçirmege planlaşıtra edi. Faqat siyasiy vaziyet sebebinden Halqara Forumnıñ keçirilmesi belgisiz müddetke keçirilgen edi.

Bu sene işğal etilgen Qırım akimiyeti Aqmescitniñ merkeziy meydanında mayıs 18 künü matem tedbirlerni keçirmege yasaq etti. Matem künü OMON nezareti altında keçti. Bundan da ğayrı, Meclis azalarınıñ evlerinde FSB tarafından tintüvler keçirildi, bundan evel Mustafa Cemilevni Qırımğa kirsetmegen ediler.
XS
SM
MD
LG