Link açıqlığı

Qırımnıñ yaqarlıq ve energetika «nazirligi» «Çernomorneftegaz» şirketiniñ başı vazifesini eda etmege 55 yaşında olğan Sergey Komissarovnı tayin etti.

Bunı şirketniñ matbuat hızmeti bildire.

Yañı yolbaşçını kollektivge Qırımnıñ «birinci baş nazir muavini» Rustam Temirgaliyev tanış etti.

Şirketniñ başı vazifesini eda etken Andrey İlin «Çernomorneftegaz»nıñ müdir vazifelerini eda eticiniñ mesleatçısı oldı.

Sergey Komissarov müendis-mehanik ihtisası boyunca suv naqliyatı müendislerniñ institutını ve Rusiye Federatsiyasınıñ Akimiyeti yanındaki halq hocalığı Akademiyasınıñ «Menecment ve marketing institutınıñ» Yuqarı Mektebini bitirdi.

Gaz saasında 1993 senesinden çalışmağa başladı. 1997 senesi OOO «Mejregiongaz» Kostromsk filialınıñ müdiri, 2004 senesi aprelde – OOO «Gazprom mejregiongaz Krasnodar» baş müdiri oldı.

2013 senesi «Yedinaya Rossiya» firqasınıñ cedveli boyunca Krasnodar diyarınıñ Qanun çıqarıcı toplaşuvınıñ deputatı olıp saylana. İqtisadiy siyaset, ticaret, maliye çarşı ve tış iqtisadiy bağlar boyunca komitetiniñ azası ola.

AB çetel işler nazirleri «Çernomorneftegaz» şirketiniñ esaplarınıñ qapatılması içün uquqiy negizni teşkil ettiler.

Öz nevbetinde Ukraina baş naziri Arseniy Yatsenük Ukraina akimiyeti Rusiyeniñ «Çernomorneftegaz» şirketiniñ saipleştirüvi boyunca Stokgolmdeki Halqara arbitraj mahkemesine muracaat etecegini bildirdi.

«Çernomorneftegaz» «Naftagaz Ukraina»ğa ait ve devlet mülkiyeti ola.
XS
SM
MD
LG