Link açıqlığı

«Tsenzurağa yoq!» 2-nci halqara yarışı saytnıñ qırımtatar variantını işlep çıqara ve qırımtatarca yazılğan işlerniñ qabul etüvini ilân ete.

Bu aqta söz yarışnıñ resmiy saytında ketmekte.

Teşkilâtçılarğa böyle qararğa kelmege Rusiye tarafından işğal etilgen Qırımdaki soñki vaqiaları, qırımtatarlarnıñ ve olarnıñ liderleriniñ zulumı siltem berdi.

«Yarışnıñ teşkilâtçıları qırımtatar halqına er bir demokratik cemiyette insannıñ esas aqqı olğan söz serbestliginiñ anayasa aqqınıñ amelge keçirüvinde qol tutmağa qarar aldı», – dep qayd eteler teşkilâtta.

Teşkilâtçılarnıñ sözlerine köre, qırımtatar tiliniñ yarışnıñ reglamentine kirsetilmesiniñ maqsadı tek destekni bildirmek degil de, keniş içtimaiy muzakere içün temel qoymaqtır.

Yarışqa işler 2014 senesi iyün 5-ne qadar qabul oluna. Bu sene yarışnıñ mevzusı: «Küreşiñiz-yeñersiñiz».

Böyle yarışnı meydanğa ketirmek içün ğaye «Tsenzurağa yoq» areketiniñ aktivistleri ve jurnalistleriniñ körüşüvinde 2010 senesi iyün ayında peyda oldı. 2011 senesi «Tsenzurağa yoq» 1-inci halqara yarışı olıp keçti. Mında 247 poster, 310 şiar. 188 şiir ve 69 esse iştirak etti. Yarışnıñ saytına dünyanıñ 83 memleketinden 46 biñ insan kirdi.

2014 senesi «Tsentr UA» cemaat teşkilâtınıñ aktivistleri yarışnı er yıl keçirmege qarar aldı.

Yarışqa işler 4 tilde: ukrain, rus, qırımtatar, ingliz tillerinde ve 5 kategoriya boyunca: resim, şiar, şiir, esse, diger işler boyunca alına.

Teşkilâtçılar aytqanı kibi, mında yaşqa, vatandaşlıqqa, tasilge baqmadan, er istegen insan iştirak ete bile. Yarışqa iç bir siyasiy küçniñ alâqası yoqtır. Yarış cemiyetniñ teşkilâtlandırmaq içün bir yoldır. Maqsadı – söz serbestligi, siyasiy tsenzura, sanat eserlerniñ tsenzurası kibi problemlerni çezmek içün bir temelni qoymaqtan ibarettir.

Yarışnıñ coğrafiyası sıñırsızdır, çünki söz serbestligi meselesi tek Ukrainada degil de, diger memleketlerde de müim yerde turmaqta.
XS
SM
MD
LG