Temirgaliyev: Sudaq ve Kefeni Şimal-Qırım kanalından suvnen temin etmege başladılar

Qırım suv anbarlarınıñ suvı yerli özenlerden Şimaliy-Qırım kanalından Kefe ve Sudaqqa berildi.

Bunı Qırım «baş naziriniñ birinci muavini» Rustam Temirgaliyev Facebook saifesinde bildirdi.

«İlk QIRIM suvı Kefe ve Sudaqqa yetip keldi! Yarımada şarqına dağ etegindeki suv anbarlarından Salğır ve Büyük-Qarasuv özenlerinden Şimaliy-Qırım kanalında suv berüv leyhası ömürge keçirildi. Qırımlılar içilgen suvnen temin etildi», – dep yaza Temirgaliyev.

Şimaliy-Qırım kanalını yerli özenlerden suvnen toldurmaq niyetini Qırım «akimiyeti» mayıs başında bildirgen edi.

Qırım işğalinden soñ yarımadada ayrı şeerlerde suv temini, suvaruv ve köy hocalıq topraqlarını suvaruvınen bağlı problemler peyda oldı.

Suv resursları devlet agentligi resmiy şekilde bildirdi ki, yerli «akimiyetnen» añlaşma olmağanından sebep, Şimaliy-Qırım kanalından suv berilmesi toqtatıldı. 1,7 mln. grn. miqdarında borclar ödenilse ve Qırım suv temininde qullanılğan tehnika qaytarılsa, suv yañıdan berilmesi mümkün.

Mayıs 14-de Rusiye mudafaa Nazirligi Eski Qırım sakinlerine artezian araçığından suv berilmesini ilân etti.