Link açıqlığı

Saatnıñ esas haberi

BMT Ukraina temsilcisi: işğalden soñ yarımadanı 7 biñden ziyade qırımtatarı terk etti


Rusiyeniñ Qırım işğalinden soñ 7 biñ qırımtatarı yarımadanı terk etmege mecbur oldı.

Bunı Birleşken milletler teşkilâtında Ukraina vekili Yuriy Sergeyev mayıs 18-de New Yorkta olıp keçken qırımtatarlar sürgünliginiñ 70 yıllığına bağışlanğan tedbirde bildirdi, dep haber ete «Golos Ameriki».

«Biñlerce qırımtatarlar sürgün etildi, olardan 40%-dan ziyade Özbekistan, Qazahistan, Uzaq Şarqta elâk oldılar. Lâkin şimdi daa bir deşetli ve facialı vaqia yüz berdi – Rusiyeniñ Qırım işğali», – dep qayd etti Sergeyev.

Onıñ aytqanına köre, Ukraina akimiyetini Qırımdaki vaziyet, şu cümleden qırımtatarlar aq-uquqlarınıñ bozuluvı, milliy lider Mustafa Cemilevniñ yarımadağa kelmage yasağı, ve sürgünlik qurbanlarını añma tedbiri keçirilmesiniñ yasağı raatsızlay.

«Biz bilemiz, tarih derslerine qulaq asmağanlar cezalanacaq», – dep ayttı BMT Ukraina temsilcisi.

Tedbirde AQŞ ve Qırım qırımtatarlar cemiyetiniñ faalleri, BMT Ukraina ve Poloniyanıñ daimiy temsilcileri, cemaat erbapları iştirak ettiler.

Mayıs 18 sürgünlik qurbanlarınıñ hatıra künü arfesinde Qırım «akimiyeti» iyün 6-na qadar Qırımda mitingler keçirilmesini yasaq etti. Qırımtatarlar sürgünlikniñ 70 yıllığına bağışlanğan 10 biñlik matem mitingini Aqmescitteki Aq-Meçet qasabasında keçirdiler.

Tedbirde rezolütsiya qabul etildi. Vesiqağa binaen, qırımtatarlar öz başına ilân etilgen Qırım Cumhuriyetine milliy-territorial muhtariyeti statusınıñ berilmesini talap eteler.

Matem tedbirleri OMON nezareti altında ve avada arbiy vertolötlar uçuşlarınen keçirildi.
XS
SM
MD
LG