Link açıqlığı

Aqmescitte 1944 senesi sürgünlik qurbanlarınıñ hatırasına çıraq yaqtılar


Mayıs 17 künü Aqmescite Aq-Meçet qasabasında «Yüregiñde ateş yaq» numayışında tahminen 500 insan iştirak etti.

Soñki yılları adetiy olğan tedbir Aqmescitte Lenin peydanında olmaq kerek edi. Faqat işğal etilgen Qırım akimiyetiniñ ve soñra qırımtatar milliy Meclisiniñ qararı ile teşkilâtçılar Aq-Meçet qasabasındaki camisi yanında topalındı, dep haber ete Qırım.Aqiqat mühbiri

«Yazıq ki, Lenin meydanını OMON, BTR ve arbiyler sarıp alğanını köremiz. Şunıñ içün biz öz numayışımıznı Aq-Meçet qasabasında keçirmege qarar aldıq, bu yer qırımtatarlar toplu yaşağan qasaba sayıla», – dep bildirdi aktsiya teşkilâtçılarından biri, Meclis azası Eskender Bariyev.

Aktsiya iştirakçileri qollarına qırımtatar milliy bayraqları ve timsallerini alıp, dua oqudılar. Bundan soñ bazıları 1944 senesiniñ sürgünlik qurbanlarınıñ hatırasına çıraq yaqtılar. Teşkilâtçılarnıñ aytqanına köre, işbu aktsiya, keçken seferleri olğanı kibi, barışıq, şiarsız ve çağıruvsız keçti.

Malüm ki, «Yüreginde ateş yaq» aktsiyası Sürgünlik qurbanlarınıñ hatıra künü arfesinde sekizinci kere ötkerile. İlki sefer onı 2007 senesi Aqmescitte teşkil ettiler. Tedbir Ukraina ealisi ve musafirlerine millet ve din mensüpligine baqmadan sürgünlik neticesinde elâk olğan ve Vatanğa qaytıp olamağanlarnıñ hatırasını. añmaq maqsadınen keçirile.

Hatırlatamız, qırımtatar milliy Meclisi cumaertesi künü mayıs 18 künü yarımadanıñ bütün regionlarında abide ve hatıra tahtaları yanında dualarnı keçirmege qarar aldı.

Evelleri «Cumhuriyet başı vazifesini eda etken» Sergey Aksönov Qırımda «Ukraina Cenübiy-Şarqısındaki vaziyeti» sebebinden iyün 6-na qadar «kütleviy tebirlireni» keçirmege yasaq etti.
XS
SM
MD
LG