Link açıqlığı

Saatnıñ esas haberi

FSB Qırımda «Gazeta Wyborcza» Moskva mühbirini yaqaladı


Aqmescit – Rusiye FSB hadimleri «Gazeta Wyborcza» Varşava gazetasınıñ Moskva mühbiri Vatslav Radzivinoviçni yaqalap, yerli idarege alıp kettiler ve 6 saat devamında şahsiyetini belgilediler ve Qırım ziyaretiniñ sebebini ögrendiler.

Vatslav Radzivinoviç Qırım.Aqiqat saytına bergen malümatqa köre, o, ukrain jurnalistleri – «İzvestiya» Moskva gazetasınıñ sabıq mühbiri, «Den» Kiyev gazetasınıñ Qırım mühbiri Nikolay Semena ve Qırım fotoressamı Lenyara Abibullayeva ile «Divan» qavehanesinde qave içip oturır eken, apansızdan FSB hadimleri gruppası kirdi ve özüni tanıtmayıp olarnı yaqaladı.

Vatslava Radzivinoviçniñ aytqanına köre, o ve onıñ Qırım zenaatdaşları vesiqalarını kösterseler de, FSB hadimleri Poloniya jurnalistini «Rusiye Federatsiyası sıñırından qanunsız alda keçüvde» qabaatladılar ve olarnen beraber «Qırım Cumhuriyetinde» FSB idaresine barıp kelmege talap ettiler.

FSB hadimleri Vatslav Radzivinoviçke ne «Gazeta Wyborcza» muarririyeti, ne Moskvadaki Poloniya elçihanesi, ne tış işler nazirligi, ne de işdeşlerinen telefon vastasınen bağlanmağa imkân bermediler ve «diger idareden» FSB hadimlerini davet ettiler.

Jurnalistlerni ayrı odalarğa oturtıp, vaqianen bağlı subet keçirdiler, dep bildirdi Radzivinoviç.

Poloniya jurnalistiniñ fikirince, FSB hadimleri onı qanunsız alda yaqalap, altı saat devamında añlaşılmağan bir «sıñır keçüvinde» qabaatlap, protokol tizdiler.

Nikolay Semena ve Lenyara Abibulayeva FSB hadimlerinen bir qaç saat devamında subetleşip, azat etildi, lâkin Qırım.Aqiqat saytına izaat bermekten vazgeçtiler.
XS
SM
MD
LG