Link açıqlığı

Aqmescitte sürgünlik qurbanlarına bağışlanğan 18 mayıs mitingi ötkerilecek. Bunı Qırım.Aqiqatqa Meclisteki qaynaq bildirdi.

Berilgen malümatqa köre, akimiyet vekilleri ile muzakereler devam ete. Adını bildirmegege rica etken qaynaq şunı bildirdi: «Amma, yasaqqka baqmadan meydanğa kelecek olğan adamlarnıñ niyetlerini közge alıp, Meclis azalarınıñ ekseriyeti mitingni ötkermek fikirindeler. Lenin meydanını qapatsalar, mitingni şeerniñ diger yerinde ötkerilmesi mümkün».

Bugün saat 13.30 dan başlap, Meclisniñ toplaşuvı ötkerilmekte, ondan soñra, resmiy qarar ilân etilecek.

Bundan evel, qırımtatarlar temsiliy organnıñ reisi Refat Çubarov Qırım «baş naziri» Sergey Aksönovnıñ iyün 6-na qadar tedbirlerni yasaq etken emirini teñqid etti.

Aytqanına köre, 23 yıl devamında qırımtatarlar matem mitinginiñ keçirilüvi ile qıyınlıqlarğa rast kelmegen ediler.

«Qırımtatarlar içün mayıs 18 künü – menliklerniñ bir qısımıdır. Biz sürgünlik devamındaelde etken ğayıplarnı iç unutmay, yaşaymız. 23 yıl içersinde, qorquzuv, suniy qozğatuvlar yoq edi. Bu sene Meclis ve Qırım akimiyeti vaqtında tedbirlerge azırlanıp başladılar. Biz tedbirlerniñ bir qısımını işlep çıqardıq ve olarnı keçirmege başladıq, ve daa devam etmek kerek», – dedi o.

Mayıs 16 künü Qırım «ükümetniñ» resmiy Facebook saifesinde «Ukrainanıñ cenüp –şarqındaki vaziyetten sebep ,kütleviy tedbirlerniñ ötkerilüvini sıñırlanuvı aqqında» emir çıqtı. Emirge köre, kütleviy tedbirler 2014 senesi iyün 6-na qadar ötkerilmeycekler.

Evelden belgilengen tedbirler lâğu etildi.

Ekspertlerniñ fikirince, böyleliknen qırım «akimieti» Qırımdaki matem tedbirlerniñ keçirilüvini idare etmege niyetlendiler. Onıñ içün, miting Aqmescitniñ merkeziy meydanı OMON tarafından qırşavğa alğan vaziyette ötkerilmesi mümkün.
Qırım İçki işler nazirliginde matem tedbirniñ iştirakçileri metallodetektordan keçmege mecbur olacaqlar, mayıs 15 künü ise, Aqmescitniñ merkezine arbiy tehnikanı aydap ketirdiler.
XS
SM
MD
LG