Qırımda Rusiye Federatsiyası FHH hadimlei qırımtatar Meclisi tış alâqalar bölüginiñ reberi Ali Hamzinniñ evinde tintüvni keçirdiler.
«Tintüv keçirildi, ebet. Amma, hucur bir şey, olar, daa eki Ural, «Berkut»nı ketirip, yolnı qapattılar. Qaynanam bile yaramay oldı – az qaldı insult olacaq edi», – dep añlattı Meclis azası.
Ali Hamzinniñ oğluna mahkeme qararını tuttırdılar, anda babsı terrorizmde şeklengeni aqqında yazıla edi. Aynı bu vaqıtta, tintüv Hamzinniñ qayd etilgen, amma yaşamağa diger evinde tintüv keçirildi. Bunı ev saibi, qırımtatarlar toplu yaşağan Aqmescit civarındaki «Vasiyet» qasabasınıñ yerli meclis azası Edem Mustafayev bildirdi.
«Aqmescitniñ Kiyev rayon mahkemesi qararını teslim ettiler. Eki saat devamında terroristik faaliyetnen bağlı patlayıcı maddeler, silânı qıdırdılar. Olarnıñ (FHH vekilleri – müel.) sözlerine köre, Hamzin soy adı taqiqat eksperimenti devamında seslendirildi», – dedi o.
Aqmescitten Taymazovlar qorantası ale daa tintüvden soñ özüne kelip olamay. Olarnıñ evinde de keçenlerde tintüv keçti. Saat 6.30 nefaqacılarnıñ qapusını Rusiye FHH hadimleri qaqtılar.
«Er şeyni baqıp çıqtılar, ast-üst ettiler, ne yapqanlarını añlatmadılar. Azbarda da qarıştırdılar, bir şey tapalmağan soñ, vesiqanı berdiler, anda da silâ qıdırğanları aqqında yazılğan edi. Biz qartlarmız, bizge silâ qaydan kelsin? Bunıñ episi bizni pek açuvlandırdı, az qaldı infarkt olacaq edim», – dey Şefika Taymazova.
Meclis vekili Ali Hamzinniñ Radіo Svobodağa bergen intervyüsâ devamında, FHH qırımtatar halqı lideri Mustafa Cemilevniñ evinde de tintüv ötkergenini bildirdi.
«İşte, Rusiye akimiyeti qırımtatarlar, Meclis, Qurultay ile bu şekilde dialog qura. Men bellesem, mayıs 18 arfesinde normal insan bu kibi provokatsiyağa qapılmamaq kerek», – dedi Ali Hamzin.
