Link açıqlığı

Golos Ameriki

Avropa Şursı memleketleri nazirlerniñ Londradaki toplaşuvında çıqışta bulunğan devlet kâtibi Con Kerri AQŞ Ukraina ükümetine qol tutqanını bildirip, siyasiy birdemlik yolunda areketlerini alğışladı.


«Biz tünevin Kiyevde ötkerilgen milliy dialognı alğışlaymız, anayasa islâatı, milliy azlıqlarnıñ qoruvı, yerli akimiyetler aqlarшnıñ keñişletüvi muzakere etildi. Ümüt etemiz ki, separatistler, ruslar ve diger gruppalar ükümet kerçekten adımlar atqanı ve tögerek masa etrafında çıqış yolunı tapmaq içün çalışqanını añlaydılar». «Biz milliy azlıqlarnıñ qorçalavı printsiplerine qol tutamız, Kiyev ükümeti regionlarnıñ aqlarını keñişletüvi boyunca konkret plannıñ işlep çıqarğanını köremiz. Şunı qayd etmek kerek ki, baş nazir teklif etken imkânlar, Rusiyede olğan aqlardan daa keñiştiк».
Kerri, mayıs 25 künü prezident saylavlarınıñ demokratik, açıq ve inklüziv şekilde keçirilmesiniñ müimligini qayd etti.

«Biz, Ukrainanıñ bütün vatandaşlarınıñ aqlarını qorumaq içün ve er kimniñ sesi eşitilmesi maqsadında doğru saylavlarnıñ ötkerilmesi içün ukrainliler ve ОСSE ile çalışamız. Biz separatistler ve ruslarnı bu ceryannı ürmet etmeknen birlikte, saylavlar olsun dep, qolundan kelgenlerini yapmağa çağıramız», – dedi o.


Kerriniñ sözlerine binaen, bu qanuniy ceryannı qorçalamaq içün AQŞ ve Avropalı şerikler areket etmege azırlar, bu cümleden, dialog ve barışıqqa qarşı turğanlarğa nisbeten 3-nci dereceli sanktsiyalarnı qullanmaq mümkün. Sanktsiyalar, Rusiye iqtisadiyatınıñ gaz ve kömür saalarınen baglı.

«Rusiye ve onıñ izdeşleri saylavlarğa keder etseler, AQŞ ve Avropa Birligini temsil etken devletler sanktsiyalarnı belli bir saalarğa qarşı qullanırlar. Bizim messacımız sade – Ukrainağa öz seçimni yapmağa keder etmeñiz. Ukrain halqına öz kelecegini seçmege beriñiz. Bunı açıq, serbest, doğru saylavlar vastasınen yapsınlar».
Kerri, qayd etkenine köre, sanktsiyalar vatandaşlarğa tesir etmey, yalıñız Ukrainadaki vaziyetni qozğatqan şahıslarğa qarşı qullanacaq.
XS
SM
MD
LG