Link açıqlığı


Bağçasaraydaki «Zıncırlı medrese» tarihiy-mimariy kompleksinde qırımtatar halqınıñ sürgünliginiñ 70 yıllığına bağışlanğan «Qaytmaq» serlevalı fotosergi açıldı. Müellifi belli fotograf Arvidas Şemetas oldı.

Sergi «Haytarma» filminiñ çıqaruv meydançığından olğan kadrlar ile başlana, soñra qırımtatarlarnıñ vatanğa avdeti ve öz aqları oğrunda küreşi kösterile.

Mında çeşit narazılıq numayışlarında iştirak etken insanlarnıñ süretlerini, lider ve qırımtatar milliy areketiniñ veteranları, medeniyette belli olğan şahıslarnıñ portretleri numayış etile. Sergi keçken küzde üç balaçıqnı doğurğan qırımtatar qıznıñ fotosüreti ile bite, bu milletniñ ğayrıdan doğuvınıñ hususiy bir timsalidir.

Soñki 20 yıl devamında yapılğan tahminen 50 iş taqdim etile. Qırım.Aqiqatqa bergen izaatında Arvidas Şemetas bu qırımtatar mevzuatı boyunca onıñ ilk sergisi olğanını ayttı. Amma evelleri o, halqara sergilerde qırımtatarlarnıñ yaşayışını aydınlatqan ayırı fotoresimlerini taqdim etken edi.

«Fotosüretlerniñ saylavı büyük edi. Bağçasaray sarayınıñ yolbaşçılığı mahsus bediiy şuranı teşkil etti. Eki ay devamında fotoresimlerni saylay edik», – qayd etti Şemetas. Onıñ aytqanı kibi, serginiñ serlevası da tesadüfiy degildir.

«Qaytmaq – bu fikir ile nice nesiller yaşadı, amma, zanımca, bu yara qırımtatar halqınıñ yüreginde daa çoq yaşaycaqtır», – dedi o.

Serginiñ açılışında olğan Bağçasaray rayon devlet memuriyetiniñ başı İlmi Umerov teşekkürni bildirip, Arvidas Şemetasqa qırımtatar tuğrası şeklinde yapılğan nişannı taqdim etti.

«Zıncırlı medrese» kompleksinde sergi iyunniñ ortasına qadar açıq olacaqtır.
Qırımda, mayıs 16-dan başlap, Qırımtatarlarnıñ sürgünliginiñ 70 yıllığına bağışlanğan matem tedbirleri keçirilmek kerek.

Bugün Qırım «akimiyetiniñ» resmiy Faсebook saifesinde ise «Ukraina cenübiy-şarqındaki adiseler sebebinden kütleviy tedbirlerniñ keçirüv sıñırlanğanı aqqında emir» yerliştirildi. «Qanun»ğa köre, yasaq 2014 senesi iyün 6-na qadar işleycektir.

Bu sebepten mayıs 6-da, üyleden soñ qırımtatar milliy Meclisiniñ acele toplaşuvı keçirilecek. Mında mayıs 18 kününe planlaştırılğan mitingniñ keçirimesi ile bağlı sual muzakere etilecek.
XS
SM
MD
LG