Link açıqlığı

Qırım eyyeti qırımtatarlar aqqında laf etmek içün Putinge ketti


Öz başına ilân etilgen «Qırım Cumhuriyetiniñ Devlet şurasınıñ» «spikeri» Vladimir Konstantinov ve Qırım «baş naziri» Sergey Aksönov Rusiye prezidenti Vladimir Putin ile körüşüvge azırlıq körgen eyyet terkibinde Soçide buluna.

Bunı Qırım.Aqiqatqa Qırım «akimiyet»inde olğan qaynaq bildire.

Olğan malümatqa köre, eyyet terkibine qırımtatarlarnıñ vekilleri de kirdi. Olarnıñ arasında qırımtatar milliy Meclis muhalifleri – «Devlet şurasınıñ» prezidium azası Edip Gafarov, «Pokoleniye Krıma» teşkilâtınıñ reisi Ruslan Balbek, «Devlet şurasınıñ» deputatı Lentun Bezaziyev ve «Milliy Firqa» yolbaşçısı Vasfi Abduraimov buluna.

Olardan da ğayrı, Rusiye Federatsiyası prezidenti ile körüşüvge davet qırımtatarlarnıñ diger vekillerine de keldi eken, şu cümleden milletler ve sürgün etilgen vatandaşlarnıñ işleri boyunca «komitet» başı Zaur Smirnov, qırımtatar milliy Meclis azası Remzi İlyasov, Saq regional meclis başı Eskender Belâlov.

Qırımtatar milliy Meclisinde bu malümatnı tasdiqlamadılar ve al-azırda izaatlamadılar.

Meclis erkânı acele toplaşuvnı keçirmekte.

Aynı şu zamanda, Rusiye matbuat vastalarınıñ malümatına köre, Putin Qırım eyyeti ile körüşti ve «qırımtatarlarnıñ merağı şimdi Rusiye ile bağlı ve o, öz nevbetinde, insanlar kendilerini öz toprağında saip olaraq duyğanı içün areket etkenini» qayd etti.

Rusiye matbuat vastalarınıñ bergen malümatlarından Putin ile körüşüvde qırımtatar aktivisti Ayder Mustafayevniñ iştiragi aqqında da belli oldı. Faqat, qaynaqlarnıñ malümatına köre, onıñ iştiragi Meclis ile añlaşılmağan edi.
XS
SM
MD
LG