Link açıqlığı

Elzara Beşuyli

Aqmescit – Qırımda tınçlıq olsun dep, qırımtatarlar provokatsiya yapmamaq kerekler, kibi fikirlerni sıq eşitmege mümkün. Misal içün, şimdi provokatsiya olaraq Meclis binasınıñ üstünde ya da qırımtatarlarnıñ qolundaki ukrain bayraqları provokatsiya kibi tanıla, amma, bu dünyanıñ iç bir köşesinde, bu cümleden Rusiyede yasaq degil. Aynı zamanda, qırımtatar bayrağını da çoq begenmeleri añlaşıla, amma, oña biraz dayanmağa qarar aldılar.


Ya da, daa bir dane «deşetli» provokatsiya - öz Vatanında yaşamaq içün sovet rejiminen küreşken Mustafa Cemilevniñ evine qaytmağa ıntıluvı…İşte, o vaqıt oña ekstremist ve provokator dep aytqan ediler.

Şunı hatırlatmağa isteyim, 1783 senesi Rusiye Qırımnı birinci kere işğal etken soñ, yarımadada qırımtatarlarnıñ bulunuvı bile, provokatsiya olaraq sayıla. Şimdilik, tek olar basqı altında olğanlarnı uydurıp, dünyanıñ er köşesinde olıp ta, tarihiy vatannı «yardımğa» çağıra bileler. Bundan pek qorqqanlar, pasportını Rusiye pasportına, soy adı, milleti, menligi, tarz areketi ile deñiştirip, cemaat arasında coyula bile.

Bazıda, «rus olmağan» adnı hafızasında tutmaq içün çoq qıynalmasınlar dep, öz adıñ yerine rus adını uydurıp aytsañ, yeterli ola, etraftakiler. Pısıp, bir köşede tınç oturıp, milliy aqlarnıñ yerine ketirilmesini talap etmey yaşamaq ta mümkün. Cenkten soñ, Qırımğa Brânsk vilâyetinden köçken qomşularımız, merametnen «Yaşay beriñiz, sizge kim keder ete. Siz köçkende biz bir şey aytmağan edik te…» dep, bizge ruhset bersinler. Bularnen daa, yahşı munasebette edik, başqalarnı aytmayım.

Bu adamlarğa rus atalar sözüni hatırlatmağa isteyim: «В чужой монастырь со своим уставом не ходят»!

Elzara Beşuyli, qırımlı

«Bloglar» rubrikasında bildirilgen tüşünceler müelliflerniñ noqtai nazarını bildirip, muarririyetnen aynı olmaması mümkün
XS
SM
MD
LG