Link açıqlığı

Keriçliler bala nefaqasını almaq içün aftalarnen nevbette tura


Keriçte «Krımpoçta» bölüklerinde bala nefaqalarını bermege başladılar. Ödevlerni elde etmek içün nevbetni daa bazarertesi künü almağa başlay ediler, faqat para ve alıcı cedvellerini tek bugün ketirdiler.

Qırım.Aqiqat mühbiri bergen malümatına köre, poçta bölüginde saba saat 8-ge tahminen yigirmi ana tura edi. «Krımpoçta»nıñ diger noqtalarında qadınlar cedvellerni tize. Misal içün, poçtanıñ 19-ncı bölüginde tahminen 200 insan cedvelge yazıldı.

Cumaaqşamı künü poçta bölüginde para olmağanı içün ziddiyet yüz berdi. Yaş analar üylelikte qapatılğan binanı terk etmege razı degil ediler, «Krımpoçta» hadimleri uquq qorçalayıcılarnı çağırdı.

Şimdi para berüv ketişatı Keriçniñ bayağı sakinlerini açuvlata. Ödevlerni almaq içün küçük balalar ile saatlernen nevbette turmağa kerek olur. Qadınlar, evelki olğanı kibi, paranı varaqalarğa alıp, er istegen vaqıtta qullanmağa imkâniyetleri olmağanına şikâyet eteler.

Faqat iş ve içtimaiy qoruv şeer idaresinde böyle imkân ne vaqıt peyda olacağını aytıp olamaylar.
XS
SM
MD
LG