Link açıqlığı

Er yıl mayıs 18-de Ukrainada Qırımtatar halqınıñ aqqı oğrunda küreş künü keçirilecek. Böyle emirni Yuqarı Şurasınıñ reisi, Ukraina prezidenti vazifelerini eda etken Оleksandr Turçinov imzaladı, dep haber ete devlet başınıñ matbuat hızmeti.

«Sabıq SSSR totalitar rejmi neticesinde etilgen sürgünlikten 70 yıl keçkeninen qırımtatar halqı öz tuvğan toprağında kene de ayırım ile rastkelgeni içün, Ukraina vatandaşları – qırımtatarlarnıñ halq tamır temsilcileri olaraq öz aqları oğrunda kürişine qol tutmaq içün, Ukrana Qanunıñ 112 maddesine köre, Ukrainada er yıl mayıs 18-de Ukrainada Qırımtatar halqınıñ aqqı oğrunda küreş kününi ilân etmege avale etem», – denile qararda.

Qırımda mayıs 16-dan başlap qırımtatarlarnıñ sürgünliginiñ 70 yıllığına bağışlanğan matem tedbirler keçirilecektir.

Mecliste qayd etkenleri kibi, bu sene tariklerniñ ögüni almaq içün, Aqmescitniñ merkeziy meydanında mayıs 18 künü matem mitingde yalıñız qırımtatar milliy bayraqları köterilecektir, Ukraina ve Rusiye timsalleri olmaycaq.

Mayıs 16 künü öz başına tayin etilgen Qırım baş naziriniñ yarımadada iyün 6 qadar kütleviy tedbirlerniñ keçirilmesini yasaq etken «qararı» peyda oldı. Ekspertlerniñ fikrine köre, böyleliknen Qırım «akimiyeti» Qırımda Sürgünlik kününe bağışlanğan tebdirlerni bütünley öz nezareti altına almaq ve matem tedbirlerni Aqmescitniñ merkeziy meydanında OMON kontroli ile keçirilecek miting ile sıñırlamaq istey.

Qırım «içki işler nazirliginde» matem tedbiriniñ iştirakçilerine metallodetektorlardan keçmege kerek olğanını qayd eteler.

Mayıs 15 künü Aqmescit merkezine polis ve arbiy tehnikanı ketirdiler.
XS
SM
MD
LG