Link açıqlığı

Rusiye uquq qorçalayıcıları qırımtatar halqınıñ yetekçisi Mustafa Cemilevniñ Bağçasaray evini öldürüvde qabaatlanğan oğlu Hayseriniñ cinaiy işi sebebinden keçirdiler.

Bunı Cemilev Tsentr jurnalistskih rassledovaniy merkezine bildirdi.

Onıñ aytqanına köre, Rusiye polisi kene taqiqat areketlerni keçirmege qarar aldı.

«Olar Hayserniñ işi boyunca kene taqiqatqa başladılar. Olğan qаidelerge köre, o, Ukraiana vatandaşı olaraq mında berilmek kerek, amma olar istemeyler. Deyler ki, kene taqiqatnı keçirecek ekenler. Yani, sanki bir şey yapılmağanı kibi, eñ başından başlaycaqlar. Bütün meselelerni: ne yerden silânı aldı, nasıl elde etti. Menden, seyfimden alğanı içün, seyfime yetmek kerektir, demek. Ömür-arqadaşım mında er şey baqılğanını aytsa da, olar «yoq, biz baqmaq kerekmiz» degenler. Olarnıñ mahkemeden nasıldır bir qarar bar edi eken», – dedi Cemilev.

Oğlunıñ adliyecisi Aleksandr Lisovoy tintüv qanunsız olğanında emindir.

«Olar bütün kvartalnı qapattılar, OMON avtobusları bir şey bekley edi. Faqat bir kimse yoq edi, tek apayı ve aydavcı bar edi. Advokat Lisovoy da anda edi, amma bu areketler qanunsız olğanından sebep, işbu arekette iştirak etmege razı olmadı ve olarnen beraber ekinci qatqa köterinmedi. Belki kerek edi, olar bir de bir şeyni bizge ketirip qaldırmasınlar», – qayd etti Cemilev.

Cumaaqşamı künü, mayıs 15-de, Rusiye Federatsiyasınıñ FSB hadimleri Qırımtatar Milliy Meclisiniñ azası Ali Hamzinniñ evinde tintüvler keçirip, eki saat devamında terroristik faaliyetinen bağlı patlav maddeleri, silânı qıdırdılar. Tintüvni ondan ziyade FSB hadimi keçirdi, eki Ural, «Berkut» hadimlerini alıp keldiler, yolnı qapattılar.

Hamzin emin, böyleliknen, Qırım «akimiyeti» qırımtatarlarğa qarşı repressiyalarnı keçire. O, Qırım FSB hadimleriniñ areketlerine mahkemede itiraz bildirmek niyetindedir.
XS
SM
MD
LG