Link açıqlığı

Saatnıñ esas haberi

Ukraina tış işler nazirligi Rusiyeden Qırım rejissöri Sentsovnıñ azat etilmesini talap ete


Ukraina tış işler Nazirligini Qırımdaki FSB hadimleri meşur ukrain rejissöri Oleg Sentsovnı yaqalağanları aqqında haber açuvlandırdı.

Bu aqqında Ukraina tış işler departamentiniñ beyanatında denile, onıñ metni Qırım.Aqiqat muarririyetinde mevcut.

«Ukrainanıñ ayırılmaz bir parçası olğan Qırım Muhtar Cumhuriyetinde Rusiye hızmetleriniñ Ukraina qanunlarına riayet etmegenlerini sert bir şekilde takbih etemiz», – bildireler tış işler nazirliginde.

Nazirlik Sentsovğa qarşı seslendirilgen qabaatlavlarnı «absurd ve aqılğa uymağan bir şey» dep adladı.

«Olar daa bir kere Kreml areketlerinen ukrain tili, tarihı ve medeniyetine olğan nefret idare etkenini isbatladılar», – aytıla beyanatta.

MİD Rusiye akimiyetinden Oleg Sentsovnıñ azat etilmesi ve «Rusiye tarafından işğal etilgen Qırım Muhtar Cumhuriyetinde Ukraina vatandaşlarınıñ aq-uquqları ve serbestliginiñ bozulmasını» toqtatmağa talap ete.

Qırımdaki FSB hadimleri tarafından Oleg Sentsovnıñ yaqalanması aqqında malümat mayıs 12-de aydınlatıldı. Onı Aqmescitte tutıp, bellisiz bir yerge alıp kettiler.

Bundan soñ Sentsovnı terakt teşkil etilmesinde şekleyler ve Moskvağa alıp keteler degen malümat peyda oldı.

Sentsov belli ukrain kinorejissöri, em de «Avtomaydan» faali ola.
XS
SM
MD
LG