Link açıqlığı

Saatnıñ esas haberi

FSB tintüvleri Cemilevniñ evine de «keldi». Qırımtatarlar qasevetlenip başlaylar


Qırımtatar Milliy Meclisi tış alâqalar bölüginiñ reisi Ali Hamzinniñ evinde keçirilgen tintüvden evel Qırımdaki FSB hadimleri qırımtatarlarnıñ lideri Mustafa Cemilev ve Meclisni temsil etken diger adamlarnıñ evinde bulunmağa yetiştirdiler.

Bunı Qırım.Aqiqat saytına Ali Hamzin bildirdi.

«Tünevin Bağçasarayda qırımtatar halqınıñ lideri Mustafa Cemilevniñ evinde tintüv keçirildi. O, evde yoq edi. Ebet, bu tintüvniñ qanun boyunca olğanınen bağlı meseleler de oldı. Aynı tintüvler Aqmescitte de, semetdeşlerimizniñ evinde keçirildi», – dep ayttı o.

Hamzin emin ki, böyle etip, Qırım «akimiyeti» qırımtatarlarğa qarşı repressiyalar keçire.

«Bu şeyler – yalıñız başı. Olarnıñ esas maqsadı – Qurultay-Meclis temsil organımıznı yoq etmektir. Menim evimde terroristik faaliyetni tasdıqlaycaq bir şey peyda olsa, şaşmam. Rusiye «akimiyeti» Meclis vekillerinen böyle bir «dialog» şekilini saylap aldı», – dep qayd etti o.

Cumaaqşamı künü, mayıs 15-de, Kiyevde keçirilgen matbuat konferentsiyasında Hamzin bildirdi ki, Qırımnıñ küç strukturalarınıñ hadimleri Eski Qırımda tahminen 150 qırımtatarını sorğuğa çektiler.

«Olarnıñ parmaq izlerini alalar, aynı vaqıtta, ne vaqıttan berli camige qatnağanlarını soraylar», – dep ayta Meclis tış alâqalar bölüginiñ reberi.

Bu sebepten, Hamzinniñ fikirince, halqara toplulıq, şu cümleden Rusiye ve Ukrainağa muracaatta bulunıp, Qırımda qırımtatarlarnıñ havfsızlığı meselesinde forum keçirmek kerek.
XS
SM
MD
LG