Link açıqlığı

Qırım ve şarqiy Ukraina qaçaqları prezident saylavlarında rey bermek içün mayıs 19-na qadar ariza bermeliler


Mayıs 25-de qayd etilgen yerde rey berip olamağan saylayıcılar Ukraina prezidentiniñ nevbetten tış saylavlarında iştirak etmek içün rey berüv yerini deñiştirmek muracaatınen ariza yazmalılar.

Bunı Azatlıq Radiosınıñ efirinde Ukraina Merkeziy saylav komissiyasınıñ reisi Mihail Ohendovskiy ayttı.

Onıñ bildirgenine köre, mayıs 19-na qadar Ukrainanıñ işğal etilmegen territoriyasında yerleşken saylayıcılarnıñ devlet cedvelini baqqan er angi organğa bunıñ kibi ariza bermeli.

Nevbetten tış prezident saylavlarında rey bermek başqa iç bir imkân yoq.

«Qırım sakinleri böyle bir ariza ve Qırım ya da Aqyarda yaşav yeri qayd etilgen pasportnı köstermek kerek. Ukrainanıñ diger vatandaşları rey berüv yerini deñiştirmege mecbur etken sebeplerni aydınlatqan vesiqalarnı teslim etmeli. Bu kira, daimiy yaşav yerinde iş, yaqınlarını baquv ve il. olması mümkün», – dep ayttı Merkeziy saylav komissiyasınıñ reisi.

Ohendovskiy bildirdi ki, bugünde-bugün Qırım ve Aqyardan 1,8 biñ kişi rey berüv yerini deñiştirmek imkânından faydalandı.

Onıñ aytqanına köre, bu raqam informatsion kampaniya sayesinde kün-künden arta.

Ukrainada 32 biñ saylav bölügi açıldı ve işke azırlanıldı, dep bildirdi TSİK reisi.
XS
SM
MD
LG