Link açıqlığı

Qırım «akimiyeti» qırımtatar qasabalarınen oğraşacaqlar


Qırımnıñ öz başına ilân etilgen «akimiyeti» yılnıñ soñuna qadar qırımtatarlar toplu yaşağan qasabalarnıñ abadanlaştırılmasına 200 million grivna ya da aman-aman 600 million ruble elde etecek olalar.

Bunı özüni «Qırım Cumhuriyetiniñ Devlet şurası» olaraq adlağan sabıq Qırım parlamentiniñ matbuat hızmeti «spiker» Vladimir Konstantinovğa esaslanıp bildire

Konstantinovnıñ qayd etkenine köre, mezkür mesele Qırım «akimiyeti» içün eñ müim ola.

«Bizler yılnıñ soñuna qadar bu esnasnı başlamağa planlaştıramız. Eñ müim meselelerden biri – bunı al etmege yardım etecek devamlı programma, misal olaraq, beş yıllıq bir programmanı şekillendirmektir. Onıñ sayesinde qasabalarda suv, ışıq, yollar ve bir şeyge yarağan körüniş olacaq. Menimce, bugünde-bugün bu eñ müim mesele», – dep qayd etti «spiker».

«Devlet şurasınıñ» milletlerara munasebetler ve sürgün olunğan grajdanlarnıñ işleri boyunca daimiy komissiyasınıñ «reisi» Edip Gafarov dey ki, bu sene abadanlaştıruv programması çerçivesinde başlaтğan leyhalar boyunca işler yekünlenecek, böyleliknen yaşav içün 15 biñ kvadrat metri işletilecek.

«Ayırılğan parağa 23 yıldan berli qurulğan 923 yerli Aqmescit mektebini açmağa planlaştırıla. 15 million grivna sürgün olunğan grajdanlarnıñ içtimaiy-medeniy inkişafına sarf etilecek. Edip Gafarovnıñ malümatına köre, sürgün olunğanlar toplu yaşağan qasabalar 30% gaz, 75% – suv, ve 90% – elektrik energiyasınen temin etilgen», – qayd eteler matbuat hızmetinde.

Bundan evel berilgen malümatqa köre, sürgün olunğanlarnıñ abadanlaştıruvı programması çerçivesinde Qırım içün 800 million ruble federal bücetinden ayırılacaq.
XS
SM
MD
LG