Bugün Qarasuvbazarda qurulayatqan caminiñ qubbesini yerleştirdiler. 5 tonnalıq qubbeni Çernigov ustaları yapıp, yerine qoydılar.
Bunı Qırım müftiyatınıñ matbuat hızmeti bildire.
Qubbeniñ qoyuv tedbirine yerli sakinler toplaştılar. Qarasuvbazarğa kelgen Qırım müftisi Aci Emirali Ablayev er kesni hayırladı ve dua etti.
«Bugünde bugün, bizim halqımız ağır künlerni yaşay, amma kelecekke ümütimiz bar, çünki dinimiz, kitabımız bizim ile, camilerniñ sayısı arta ve bizni qanaatlendire. Amma, camilerniñ qurucılığını devam ettirmek, olarnı kelecek nesillerge qaldırmaq eñ büyük istegimizdir», - dep qayd etti Aci Emirali Ablayev.
Caminiñ qurucılığı 2013 senesi yanvar ayında metsenat ve iş adamı Resul Velilâyev ve ağasınıñ desteginen başlandı. Cami 500 adamnı sığdıracaq. O eki qattan ibaret olıp, mağazında dershane, salon, abdesthane ve aşhane bulunacaq.
R. Velilâyevniñ aytqanına köre, şimdiki vaqıtta minarelerni qurmaq içün Türkiye mütehassıslarnı celp etmek lâzim.
Bu cami, qırımtatarlar vatanğa avdet olğan soñ, birinci büyük camidir. Sürgünlikten evel, Qarasuvbazarda 27 cami bar edi.
