Link açıqlığı

Qırımda mayıs 3-de Qırım ile sıñırda qırımtatar halqınıñ lideri Mustafa Cemilevni qarşılağan adamlarnı mesülietke çekmege devam eteler.

Qırımtatar Milliy Meclisiniñ uquqçısı Teyfuk Gafarovnıñ malümatına köre, Qırım mahkemeleri bunıñnen bağlı 55 işni baqtı, cezalar miqdarı 700 biñ rubleni teşkil etti.

«Qurman rayonı 18 iş – olardan 6 danesi 40 biñ rublelik para cezası, 8 danesi 15 biñ rublelik para cezası, 10 biñ rublelik 4 para cezası, Aqmeçit rayonı 7 iş – 10 biñ rublelik 6 para cezası, 1 iş qapatıldı. Bağçasaray 17 iş – 11 biñ rublelik 11 para cezası, 2 danesi 15 biñ rublelik para cezası, 10 biñ rublelik 14 para cezası. İslâm Terek rayonı 10 iş – olardan 3 tenbiyelev, 1 qapatıldı, 10 biñlik 2 para cezası, Aqmescit ş. 3 iş – olardan 1 danesi OVD baqılmasına yollanıldı, 10 biñlik 2 para cezası» – dep yaza Facebook saifesinde Gafarov.

O, şunı qayd etti ki, er iş boyunca apellâtsion şikâyet berildi. Bundan ğayrı, uquqçı uquq qoruyıcılar tarafından sual berilse, tek advokat yanında cevap bermege tevsiye etti. Buña Rusiye qanunlarınıñ ruhseti bar.

Gafarovnıñ aytqanına köre, mahkeme qararını advokatsız alğan adamlar Meclisniñ uquqiy idaresine vesiqanı berip, apellâtsion şikâyet azırlamaq kerek.

Mayıs 3-de Mustafa Cemilevni Qırımğa kirsetmediler. Bundan sebep qırımtatarlar Ermeni Bazar yanındaki sıñırda narazılıq aktsiyasını ötkerdiler.

Bundan soñra Qırım «prokurorı» Natalya Poklonskaya Meclis reisi Refat Çubarovnı «ekstremizm faaliyetiniñ yasağı» aqqında tenbiyelep, Meclis yoq etilmesi ve onıñ faaliyeti yasaq etilmesi mümkün, dep bildirdi. Narazılıq aktsiyasınıñ iştirakçilerine nisbeten mahkeme muşavereleri olıp keçti, olarnıñ neticelerine esaslanıp, adamlarnı 10 biñ rublege cezaladılar.

Mustafa Cemilev Avropa mahkemesine muracaat etecegini bildirdi.
XS
SM
MD
LG