Link açıqlığı

Aqmescitte NBU binasını silâlı adamlarnen beraber zapt etken yerli «akimiyet» işğal etilgen Qırımda içtimaiy tölevlerni bermege imkân qaldırmadı.

Bu malümat Ukraina Milliy bankınıñ saytında yerleştirildi.

Milliy bank malümatına köre, mayıs 8-de aqşam silâlı adamlar taqımı Qırım Muhtar Cumhuriyetindeki Ukraina Milliy Bankınıñ Baş idaresi binasına kelip, onıñ faaliyetini blok etti.

«Blok etkenler arasında «Qırım Cumhuriyeti nazirler Şurası, uquq qoruyıcı ve mahkeme organlarınıñ» vekilleri bar edi. Olar Qırım Muhtar Cumhuriyetiniñ Hocalıq mahkemesiniñ 2014 senesi mayıs 8-ne ait № A83-120/2014 iş boyunca icra cedveline riayet etmek kerek, dep bildirdiler», – aytıla beyanatta.

Müessisede qayd etkenlerine köre, işbu icra cedveli Ukraina qanunlarına riayet etmey ve Milliy bank tarafından yerine ketirilmeycek.

Milliy banknıñ binadan qıymetli şeylerni çıqarmaq ıntıluvları imkânsız oldı, çünki yerli «akimiyet» organları böyle bir imkân bermediler.

Milliy bank malümatına köre, Qırım Muhtar Cumhuriyetinde Ukraina Milliy Bankı Baş idaresiniñ blok etilgen para miqdarı 4,6 mlrd. grn teşkil ete, şu cümleden 3,9 mlrd. grn naqıt parası.

Matbuat hızmetiniñ malümatına binaen, Milliy bank ketirilgen zarar ve masraflarnıñ ödenilmesi içün mahkemede dava açtıra bile.
XS
SM
MD
LG