Link açıqlığı

Bazarertesi künü Avropa Birliginiñ ukrain ve rusiyeli vatandaşlarına qarşı ceza cedveline deñişmeler kirsetildi, cedvelde Qırım prokurorı Natalya Poklonskayanıñ adı peyda oldı.

Bunı Avropa Birliginiñ AB Şurası tarafından cedvelge 13 adam ve 2 Qırım şirketini kirsetmek qararını derc etken mecmuası bildirdi.

Poklonskaya, AB Şurasında qabul etilgen qararğa köre, «Rusiyeniñ Qırım işğali yönelişinde faal adım ata». Onıñnen beraber cedvelde Slavânsk şeer yolbaşçısı Vâçeslav Ponomaröv, «Regionlar fiqası» firqasından prezident vazifesine sabıq namzet Oleg Tsaröv, Rusiye prezidenti memuriyetiniñ reber muavini Vâçeslav Volodin, anayasa qanun çıqarıcı duma komitetiniñ reisi Vladimir Pligin, Rusiye VDV komandanı Vladimir Şamanov, memurlar Pötr Yaroş, Oleg Kozüra, İgor Şevçenko, öz başına ilân etilgen Donetsk halq cumhuriyetiniñ reberlerinden biri İgor Kakicanov, Donetsk ve Lugansk vilâyetlerinde «referendum» keçirilmesi boyunca saylav komissiyasınıñ reisi Aleksandr Malıhin adları bar.

Böyleliknen, Ukraina buhranından sebep cezalanacaq şahıslarnıñ sayısı 61 adamnı teşkil etti. Olarğa AB memleketlerine kiriş yasaq etile. Bunıñnen beraber olarnıñ Avropa Birliginde olğan esapları ve olarğa bağlı teşkilât ve müessiselerniñ para esapları qapatıla.

AB tış işler nazirleri Qırım ve Aqyarda şirketler esaplarını qapatmaq içün uquqiy sebep taptılar. Bu – «Çernomorneftegaz» ve «Feodosiy» şirketleri. Bu eki şirket Qırım «parlamentiniñ» qararınen Rusiye devletiniñ mal-mülkine keçti.
XS
SM
MD
LG