Moskva qırımtatarları Amet han Sultannıñ hatırasını añdılar

Moskvadaki qırımtatar cemiyeti efsaneviy qırımtatar uçucısı, Sovet Birliginiñ eki defa qaramanı, podpolkovnik Amet han Sultannıñ hatırasını añdı.

Er sene mayıs 9 künü cemiyet vekilleri qaramanğa ürmet bildirmek maqsadı ile Moskvada, Novodeviçye mezarlığında defin etilgen Amet han Sultannıñ qabiri yanında toplaşalar. Adet üzre dualar oquldı, gençlerge qaramannıñ ayatı ve cesareti aqqında tarif etildi.
Cenk yılları podpolkovnik Amet han Sultan 603 arbiy uçuşnı keçirdi, 103 ava uruşında duşmannıñ 30 uçağını, zumreviy ava uruşında ise 19 uçaqnı urıp yıqtırdı. «SSCB nam qazanğan uçucı-sınavcı» unvanınıñ saibi, eki defa Sovet Birligi Qaramanı unvanı, üç defa Lenin Nişanı, dört defa Qızıl Bayraq nişanı, Aleksandr Nevskiy Nişanı ile taqdirlendi. Cenkten soñ Moskva vilâyetiniñ Jukovsk şeerinde yaşadı. 1971 senesi sınav uçuşı vaqtında elâk oldı.