Link açıqlığı

İçki işler Nazirligi Odessadaki vaqialarnıñ esas sımalarını yaqaladı


Uquq qoruyıcılar mayıs 2-de Odessada areket etken ekstremistik teşkilâtlarınıñ esas şahıslarını yaqaladı.

Bunı Azatlıq Radiosı Ukraina içki işler Nazirligine esaslanıp bildire.

«Yaqalanğan Davidçenko ve Doljenkovnı Kiyevge taqiq areketleri içün yollanıldı», – dep ayttı Ukraina içki işler naziriniñ muavini Serğiy Çebotar.

İçki işler Nazirliginiñ beyanatına binaen, mayıs 2-de olıp keçken adise-vaqialarnıñ daa bir iştirakçisi, Odessa şeer şurasınıñ deputatı Sergey Bovbalannı yaqaladılar.

«Onı ekstremizm, hususan, kütleviy qalabalıq ve memuriy binalarnı zapt etüvde qabaatladılar», – dep qayd eteler militsiyada.

İçki işler nazirliginiñ vekili dey ki, Odessa vilâyetinde ekstremistik ve cinaiy birleşmeler regiondaki vaziyetni kerginleştirmege tırıştı.

Olar çetel devletlerniñ strukturaları ile Odessada Rusiyege qol tutqanlarnıñ memnüniyetsizligini doğurmağa çalıştılar.

Nazir muavininiñ atqanına köre, al-azırda militsiya Odessada tınçlıq olması içün er şey yapa.

Malüm ki, mayıs 2-de Odessada yüz bergen facialı adise-vaqialardan soñ vilâyette militsiya reberliginiñ büyük bir qısmı işten boşatıldı.

Mayısnıñ 2-de Odessada Ukraina ve Rusiye tarafdarları arasında yüz bergen çatışma neticesinde 46 insan elâk oldı. Olarnıñ çoqusı Odessa zenaat birlikleri Evinde yanğın vaqtında boğuldı.

Ukraina havfsızlıq hızmetiniñ malümatına köre, Odessada çatışmalarnıñ teşebbüsçileri olğan qanunsız arbiy birleşmelerniñ areketlerini tanılmağan Pridnestrovyeden Rusiye diversion gruppaları teşkil etti.
XS
SM
MD
LG