Link açıqlığı

Qırım Ukraina cenübiy-şarqından siyasiy qaçaqlarnı qabul etmege azır, dedi jurnalistlerge Qırım baş naziri Sergey Aksönov.

«Çeşit siyasiy sebeplerden qıdırılğan, fikir ve mevamı içün taqip etilgen siyasiy erbaplar bugün Qırımda sığınaq tapa bileler. Bunda iç bir şübe yoq. Biz er keske qol tutarmız, qorantalarına da», – dep bildire Aksönovnıñ sözlerini Qırım «akimiyetine» yaqın «Krıminform» saytı.

Al-azırda Ukraina cenübiy-şarqından Qırımğa kelgen qaçaqlarnıñ sayısını Aksönov aytıp olamadı. «Kütleviy muracaatlar daa kelmey», – dedi o.

Aprelniñ ortasında silâlı boyevikler Donetsk ve Lugansk vilâyetleriniñ bir sıra şeerlerinde memuriy binalarnı zapt etti. Mayıs 2 künü Slavânsk ve Kramatorskta içki işler nazirliginiñ, Milliy gvardiya ve ordunıñ quvetleri ile antiterroristik ameliyat başlandı.

Mayıs 2 künü Odessada Ukraina ve Rusiye tarafdarları arasında yüz bergen çatışma neticesinde 46 insan elâk oldı. Olarnıñ çoqusı Odessa zenaat birliginiñ Evinde olğan yanğın aqibetinde boğulıp qaldı. Ukraina havfsızlıq hızmetinde Odessadaki çatışma ve tertipsizlikler tanılmağan Pridnestrovye territoriyasından Rusiye diversion taqımları tarafından idare etilgenini haber ettiler.
XS
SM
MD
LG