Link açıqlığı

«Qırım Cumhuriyetiniñ Devlet Şurası deputatlarınıñ saylavı aqqında» qanun ekinci oquvda qabul etildi. Saylavlar 2014 senesi sentâbr 14 künü olacaqtır.

Bunı qanunsız Qırım parlamentiniñ matbuat hızmeti bildire.

Vesiqanı Rusiye Federatsiyasınıñ Anayasa federal qanunlarına uyğun kelgen 29 deñişmelerni köz ögüne alıp tasdiqladılar.

Böyleliknen, qabul etilgen «qanunğa» köre, nevbetteki saylavlarnı Qırım «parlamenti» saylavlarğa eñ çoq 100 kün ve eñ az 90 kün qalğanda ilân etile. Müddetten evel saylavlarnıñ tayin etüvi aqqında qararnı Qırım Saylav komissiyası qabul ete. Saylav bolükleri saylavlarnıñ keçirilmesi aqqında qararnıñ resmiy ilânından 10 künden soñ teşkil etilmeli.

«Qırım Cumhuriyetiniñ Devlet Şurasınıñ deputat saylavlarında saylayıcılar aqqında malümat saylavlarğa eñ az 30 kün qalğanda toplanıla ve mütenasip saylav komissiyalarğa taqdim etile», – dep aytıla matbuat hızmetiniñ beyanatında.

Aprel 30 künü işbu qanun leyhası Qırım «parlamentiniñ» tarafından birinci oquvda qabul etildi. Saylavlardan soñ tanılmağan Qırım Cumhuriyetiniñ şeer şurası 75 deputattan ibaret olacaq, olardan 25 öz başına, 50 – cedvel boyunca saylanacaq.

Bugün Qırım deputatları olacaq küz saylavlarına Saylav komissiyanı teşkil etti ve tasdiqladı.
XS
SM
MD
LG