Link açıqlığı

Qırım «halq imayesi», yani «samooborona» vekilleri Qırımtatar Milliy Meclisiniñ azası Abduraman Egizge ücüm ettiler.

Vaqia Aqmescit merkezinde Gorkiy soqağında yüz berdi. «Men maşinanı toqtatqan soñ, yanıma bir qaç adam kelip, özüni «samooborona» olaraq tanıttı ve vesiqalarnı köstermege talap etti», – dep ayta Egiz.

O, belgisiz adamlarnıñ talaplarına riayet etmege istemedi ve politsiya hadimlerini çağırmağa teklif etti. Tahminen 20 adam pasportnı ve, bundan ğayrı, maşinanı açıp köstermege talap etti.

Abduraman Egiz bu talaplarnı yerine ketirmekten vazgeçti. Bundan soñra «halq imayesiniñ» vekilleri Meclis azasınıñ qollarına kelepçe kiydirip, ştabqa alıp ketecek oldılar.

O, qarşılıq kösterdi, neticede ise oña zarar ketirdiler. Meclis azasına yardım etecek olğan daa bir qaç qırımtatar oğlanına zarar ketirildi. Neticede Egiz pasportnı kösterdi. «Halq imayesiniñ» vekilleri onıñ Aqmescitte yaşağanını körip, yiberdiler.
XS
SM
MD
LG